Kesh shymyldyǵyn «Jaıqońyr» qazaq ulttyq folklorlyq ansambli kúımen ashty. Sondaı-aq bul kúni elimizdiń eńbek sińirgen qaıratkeri, Toraıǵyrov ýnıversıtetiniń professory Erbol Aıtbaev, mádenıet qaıratkeri Jánibek Málikov, I.Baızaqov atyndaǵy oblystyq fılarmonııanyń ánshisi Janbolat Baısoltan, respýblıkalyq jáne halyqaralyq konkýrstardyń laýreaty Saltanat Qısatova, ýspendik ónerpaz Erbaq Qurmetjan óz ónerlerin kórsetti.
Sonymen qatar Aqan seri atyndaǵy I respýblıkalyq konkýrstyń bas júldegeri Jaıdar Shunan, «О́ner» qalalyq mádenıet saraıynyń ánshisi Muhıt Nurbol, Estaı atyndaǵy balalar mýzyka mektebiniń ónerpazdary Maneıhan Qýandyq, Azamat Áset, Tilegen Bilál, «Atamura» mádenıet ortalyǵynyń dástúrli ánshileri Jomart Qabykenov, Suńǵat Kópejanov, Bolatbek Shalanov, jas ánshi Aıdyn Beısen, halyq arasynan shyqqan búrkitshi, atbegi, ánshi Qýat Kárimov kórermenniń ystyq yqylasyna bólendi.
Atap óterligi, án keshiniń formaty bul joly ózgesheleý boldy. Jas aqyn Erbolat Ámirenov ánshilerdi jaı habarlaýmen shektelmeı, oryndalatyn ánderdiń shyǵý tarıhy, óner zertteýshileriniń bergen baǵasy týraly qysqa málimet aıtyp otyrdy.
Jınalǵan jurtshylyq Aqan seriniń shoqtyǵy bıik «Syrymbet», «Balqadısha», «Mańmańger», «Láılim shyraq», basqa da ánderin erekshe qabyldap, ónerpazdarǵa tik turyp, qurmet kórsetti.
Sondaı-aq kesh barysynda Talant Tejekenov pen Qaırat Toqan kompozıtordyń «Kerbez kerik», «Uzaq aqjeleń» kúılerin oryndap, halyq qoshemetine ıe boldy.
EKIBASTUZ
