Úkimet basshysy sońǵy úsh jylda osy oblystarda 59 myńnan astam bıznes jobasy memlekettik qoldaý sharalarymen qamtylǵanyn atap ótti. Atap aıtqanda, 1,5 trln teńgege 28 myń jobanyń syıaqy mólsherlemesi sýbsıdııalandy. Onyń ishinde orta bıznestiń jalpy somasy 406 mlrd teńge bolatyn 2,5 myńnan astam jobasy qoldaý tapty. Sonymen qatar 12 myń sýbektige 487 mlrd teńgege jeńildikpen qarjylandyrý usynyldy, onyń ishinde 102 mlrd teńgege 167 orta bıznes ókilderiniń jobalary qarjylandyryldy.
«Salalar boıynsha qoldaý sharalary óńdeý ónerkásibi, kólik, qurylys, aýyl sharýashylyǵy, saýda salalaryna, sondaı-aq densaýlyq saqtaý jáne bilim berý salalaryndaǵy áleýmettik jobalarǵa baǵyttaldy», dedi Álıhan Smaıylov.
Kezdesý barysynda kásipkerler balyq salasyn damytýdyń, atap aıtqanda, jabdyqtardy jańartý, ınfraqurylymdy jańǵyrtý, ozyq standarttar engizý jáne ónim eksporty, munaı-gaz mashına jasaý salasyndaǵy ımportty almastyrý, munaı servısin qoldaý, batys óńirlerdiń kólik-logıstıkalyq múmkindikterin keńeıtý, salyq salý jáne basqa da birqatar ózekti máseleni kóterdi.
Máselen, «Edil-Oral.kz» JShS operasııalyq dırektory Vıacheslav Kondrashıhın munaı-gaz ındýstrııasy úshin jalpy quny 3,9 mlrd teńge bolatyn jabdyqtar óndiretin jańa jobany tanystyryp, memleket tarapynan beriletin preferensııalar boıynsha járdemdesýdi surady.
Premer-mınıstr búgingi tańda Qazaqstandaǵy ınvestorlar úshin memleketten qoldaý men preferensııalar alýdyń birqatar tetigi jumys isteıtinin atap ótti. Atap aıtqanda, mundaı jeńildikter arnaıy ekonomıkalyq aımaqtardyń qatysýshylaryna jáne ınvestısııalar týraly kelisim aıasynda kózdelgen.
«Biz olardy jańa jobalar úshin arnaıy ázirledik. Mashına jasaý salasyna keletin bolsaq, qazir bizde arnaıy keshendi damý jospary ázirlenýde, onda da birqatar qoldaý sharasy kózdeletin bolady. Biz mashına jasaý kompanııalary QQS tólemeı (esepke alý ádisimen), ákele alatyn jabdyqtar men quramdas bólikterdiń tizbesin keńeıttik. Sondaı-aq «Damý» qorynyń jelisi boıynsha ınvestısııalyq jobalardy iske asyrý kezinde paıyzdyq mólsherlemeni sýbsıdııalaıtyn arnaıy «О́ndiris» shaǵyn baǵdarlamasyn iske qosý josparlanyp otyr», dedi Álıhan Smaıylov.
Taǵy bir ózekti másele «Sarja» kópfýnksıonaldy teńiz termınalyn salý aıasynda teńiz túbin tereńdetý jumystaryn júrgizýge qatysty boldy. Premer-mınıstr ýákiletti memlekettik organdarǵa jobany iske asyrý merzimderin keshiktirmeı, máseleni jedel pysyqtaýdy tapsyrdy.
Sonymen qatar otyrysqa qatysýshylar batys óńirler úshin túıe sharýashylyǵy sııaqty AО́K-tegi áleýeti zor baǵytty damytý, farmasevtıkalyq ónimder óndirisin ulǵaıtý, otandyq kompanııalardyń jer qoınaýyn paıdalanýshylardyń satyp alýlaryna qoljetimdiligin keńeıtý jáne basqa da birqatar máseleni talqylady.
Barlyq kóterilgen másele boıynsha ortalyq memlekettik organdardyń, ulttyq kompanııalardyń, oblys ákimdikteriniń basshylary jaýap berip, problemalyq máselelerdi baqylaýǵa aldy.
Talqylaýdy qorytyndylaı kele, Premer-mınıstr Úkimet orta kásipkerlikti damytý men keńeıtý úshin barynsha qolaıly jaǵdaı jasaýdy jalǵastyratynyn atap ótti.
«Búginde sizderdiń óńirlerińizde tek 517 orta bıznes sýbektisi jumys isteıdi. Bul – orta bıznesti qurý, damytý, keńeıtý áleýeti tolyq paıdalanylmaı, ol ekonomıkany ártaraptandyrýǵa jáne ekonomıkalyq ósimdi arttyrýǵa yqpal ete almaı jatyr degen sóz. Biz orta bıznestiń barlyq bastamasyn belsendi túrde qoldap, olardyń tezdetip iske asyrylýyna járdem beretin bolamyz», dedi Álıhan Smaıylov.
Úkimet basshysy óńirlerdiń ákimdikteri ınfraqurylym júrgizý, jer ýchaskelerin bólý jáne olardyń quzyretine kiretin basqa da máseleler boıynsha kórsetiletin qoldaý deńgeıin arttyrýy qajet ekenin aıtty. О́ńirlik damý ınstıtýttary da orta bıznespen yntymaqtastyqty keńeıtýi kerek.
«Ár ákimdik alańynda kásipkerlerdiń máselelerin sheshý boıynsha júıeli kezdesýler ótkizý qajet. Bıznes memlekettik basqarýdyń barlyq deńgeıinde qoldaýdy sezinýi kerek», dedi Álıhan Smaıylov.
