Rıta Bakısheva shırek fınalǵa deıin súrinbeı jetip, júldege bir taban qalǵanda qazirgi álem chempıony, 2021 jylǵy Eýropa chempıony Lına Stoıkovıchke jol berdi. Asa tartysty ótken aıqastyń alǵashqy raýndynda otandastarymyz kóp dál soqqy jasap, basym tústi. Alaıda 21 jastaǵy horvatııalyq tarazy basyn teńestirip, osydan keıin sheshýshi raýndta da utyp ketti. Rıta 1/8 aınalymynda aýstralııalyq Djýlet Dahýdty, onyń aldynda ıspanııalyq Laýra Kortegoso Lımany aıqyn basymdyqpen jeńgen.
Javohırhon Islamov Býrýndıden kelgen Benýmýgısha Gaı Kalebti oısyrata utyp, chempıonatty jarqyn jeńispen bastaǵan. Alaıda 2-aınalymda Germanııa quramasynyń ókili Haled Abdel Halımniń myqty ekenin moıyndaýǵa májbúr boldy.
Erteń daıang tórinde Nazym Mahmutova (62 kg) men Nurqanat Qojahmetov (74 kg) baǵyn synap kóredi.
Jalpy bıylǵy dodaǵa 145 elden myńǵa tarta taekvondoshy jınaldy. Aıta keteıik, Bakýde ótip jatqany taekvondodan XXVI álem chempıonaty. Bıylǵy doda Halyqaralyq taekvondo federasıasynyń 50 jyldyǵymen tuspa-tus kelip tur. Aldaǵy aptada munda Parıj Olımpıadasyna qajet upaılar sarapqa salynady. Bul sportta reıtıngi eń joǵary báseke – Olımpııa oıyndary (G20). Odan keıin álem chempıonaty (G14), Gran-prıdiń fınaly (G10) men Gran-prı sanatyndaǵy jarystar (G6) tur. Álem chempıony 140 ball alsa, kúmis júlde úshin 84, qolaǵa 50 upaı beriledi.
