Foto: Adılbek Taýekelov
Elordadaǵy Abaı Qunanbaıuly atyndaǵy №87 mektep-gımnazııasynyń qoldaýymen ótken týrnırge 2012-2013 jyldary týǵan alty komanda qatysty.
Bul jolǵy týrnırdiń erekshiligi - arnaıy chelendj. Iаǵnı bir ýaqytta Astanadaǵy birneshe mektepte dál osyndaı týrnır bastaý aldy. Sondaı-aq qatysýshy barlyq komandaǵa júldeler men medaldar úılestirildi. Jarys aınalmaly júıede ótti. Erejege saı barlyq komanda bir-birimen ózara kezdesip, jeńimpazdy anyqtady.
«Balalarymyzdyń deni saý bolýy úshin sportpen aınalysý kerek ekeni belgili. Sol maqsatta biz 1 maýsym – balalardy qorǵaý kúnine oraı fýtboldan qalalyq týrnır uıymdastyryp otyrmyz. Bul kún balalar úshin meıram. Sol sebepti de týrnırge qatysqan balalardyń barlyǵy júldege ıe bolady. Mundaı jarystar mektebimizde kóptep uıymdastyrylyp keledi», deıdi mektep dırektory Aıgúl Qashaeva.
Týrnır qorytyndysy boıynsha eki toptan sýyrylyp shyqqan tórt komanda jartylaı fınalda kezdesip, fınalda qaı komandanyń oınaıtynyn anyqtady. Nátıjesinde fınaldyq oıynda Alash-2014 komandasyn 5:3 esebimen jeńgen Namys komandasynan jasaqtalǵan «Abaı» mektebi jeńimpaz atansa, úshinshi oryndy «Birlikten» 2:1 esebimen basym bolǵan «Qazǵarysh» mektebi túıindedi.
«Bizge osyndaı týrnırler unaıdy. Sebebi bul týrnır jeńiske jetýimizge, chempıon bolýymyzǵa motıvasııa beredi. Abay CUP týrnırin uıymdastyrýshylarǵa rahmet aıtamyn», deıdi «Abaı» mektebiniń oqýshysy Zańǵar Ábdikerim.
Atalǵan týrnırde jekeleı komandalardan bólek, jekeleı oıynshylardyń da sheberligi eskerildi. «Eń úzdik qaqpashy» atalymy – Anýar Jaqanǵa (Namys), «Eń úzdik qaqpashy» – Jalǵas Serikke (Alash), «Eń úzdik qorǵaýshy» – Darhan Shakırge («Birlik»), «Eń úzdik shabýylshy» Álıhan Dáýletbekke («Qazǵarysh»), «Eń úzdik oıynshy» Mansur Amangeldige (Alash) buıyrdy.
