Úkimette habarlaǵandaı, búginde elimiz boıynsha naýqandyq jumystar aıaqtalyp keledi. Úkimet qarjy bólý jáne materıaldyq-tehnıkalyq qamtamasyz etý máselelerin tolyǵymen sheshti. 140 mlrd teńge kóleminde bıýdjettik kredıt bólindi. 21 mlrd teńge qarajat ónimdi forvardtyq satyp alýǵa baǵyttaldy. Dıhandarǵa 522 myń tonna astyqqa taýarlyq kredıt berildi.
«Mıneraldy tyńaıtqyshtar óndiretin otandyq kompanııalarmen kelisim-sharttar jasalyp, ónimdi sýbsıdııalaýǵa jergilikti bıýdjetterden 31 mlrd teńge bólindi. Sondaı-aq atalǵan sýbsıdııalardy keshiktirmeı berý úshin egis alqaptaryn sıfrlandyrý 1 jylǵa keıin shegerildi. Biz bıyl agroónerkásip salasyn memlekettik qoldaý júıesin kóp ózgertpeı, barynsha saqtap qalǵanymyzdy atap ótkim keledi», dedi Álıhan Smaıylov.
Qazaqstannyń óz astyǵy ózine tolyq jetedi. Qalǵan aýqymdy bóligin eksportqa da shyǵarady. Bıyl Qazaqstan bıdaıy Qytaı Halyq Respýblıkasyna jetkizile bastady.
«Aýa raıy qolaısyz bolyp, astyq shyqpaı qalǵan kúnniń ózinde bizdegi ishki qajettilik eń az jınalatyn kólemnen 2 ese tómen. Iаǵnı, astyqtyń kólemi eldegi ishki suranys pen azyq-túlik qaýipsizdigin qamtamasyz etýge tolyq múmkindik beredi», dep atap ótti Álıhan Smaıylov.
Ol Aýyl sharýashylyǵy mınıstrligi óńir ákimdikterimen birlesip, fermerlerdiń agrotehnologııalyq talaptardy saqtaýyn qamtamasyz etýi tıis ekenin aıtyp ótti.
«Oblys ákimderi egis alqaptaryn aramshópter men zııankesterge qarsy hımııalyq óńdeý jumystaryn baqylaýǵa alýy kerek. Sonymen qatar ósimdikterdi qorǵaý jónindegi is-sharalar tizbesi men sýbsıdııalaý normatıvterin bekitý kerek», dedi Úkimet basshysy.
Qorytyndylaı kele, Premer-mınıstr dıhandardyń málimdelgen bıdaı kólemin «Azyq-túlik korporasııasyna» ýaqytyly jetkizý týraly mindettemeleriniń oryndalýyn qamtamasyz etýdi jáne jyl sońyna deıin alqaptardy sıfrlandyrý boıynsha qajetti sharalardy qabyldaýdy tapsyrdy.
