Jarystyń ashylý rásimine Almaty qalasy ákiminiń orynbasary Arman Qyryqbaev, Respýblıkalyq shahmat federasııasynyń prezıdenti Tımýr Týrlov, Azııa shahmat federasııasynyń bas hatshysy Hısham ál-Taher jáne ózge de laýazym ıeleri qatysty. «Halyqaralyq jarystardy ótkizý tájirıbesi bizdiń shahmat federasııasynyń jumysyn nyǵaıtýǵa, elimizde osy ónerdi damytýǵa kóp septigin tıgizedi. Osyndaı is-sharalardyń arqasynda Qazaqstannan áli kóptegen chempıonnyń shyǵatynyna senimdimin», deıdi Týrlov.
Balýan Sholaq atyndaǵy sport saraıynda ótip jatqan jarys shveısarııalyq júıe boıynsha 9 týrdan turady. Alǵashqy týrdyń nátıjesinde Rınat Jumabaev, Murtas Qajyǵalıev, Denıs Mahnev, Nógerbek Qyzybek, Arnash Baýyrjan, Lııa Qurmanǵalıeva, Ámına Qaıyrbekova jáne taǵy basqa jerlesterimiz jeńiske jetti. Atalǵan doda 12 maýsymda óz máresine jetedi.
