Elimizdiń barlyq óńirinen kelgen komandalar arasyndaǵy kezdesýler tartysty ótti. Spartakıadada top jarýdy maqsat tutqan quramalar jeńistiń bıik tuǵyrynan kóriný úshin baryn saldy.
Jambyldyq voleıbolshylar men Soltústik Qazaqstan oblysynyń komandalary arasynda ótken jartylaı fınaldyq kezdesý shıelenisken jaǵdaıda órbidi. Birinshi sette áýlıeatalyqtar eki dop aıyrmasymen basymdyq tanytqannan keıin ekinshi jáne úshinshi kezeńde qonaqtar jeńisti julyp alǵan. Oıynnyń tórtinshi seti tartysqa toly boldy. Qaı komandanyń basym túsetini sońǵy sátke deıin beımálim edi. Alaıda óz alańynda baryn salǵan jambyldyqtar sońǵy eki upaıdy qatar ıelenip, 38:36 esebimen jeńiske jetti. Al sheshýshi partııada 15:12 esebimen basymdyq tanytqan áýlıeatalyq ujym bar kúshin sarqa jumsap, fınalǵa joldama aldy.
Jartylaı fınalda eń qıyn kezdesýin ótkizgen Jambyl oblysynyń quramasy aqyry spartakıada jeńimpazy atandy. Olar sońǵy kezdesýde Pavlodar oblysynyń jigitterinen aılasyn asyrdy. Túrkistan oblysynyń jigitteri úzdik úshtikti túıindedi.
Qyzdar arasynda ótken básekede Qaraǵandy oblysynyń burymdylary qarsylas shaq keltirmese, Soltústik Qazaqstan oblysynyń arýlary ekinshi oryndy, Shyǵys Qazaqstan oblysynyń qyzdary úshinshi oryndy ıelendi.
Spartakıadada sý dobynan ótken erler men áıelder básekesinde aıtarlyqtaı sensasııa tirkelgen joq. Arýlar básekesinde ulttyq quramanyń negizin quraıtyn «Aısha bıbiniń» arýlary favorıt sanalsa, erler básekesinde mamandar almatylyqtardyń top jarý múmkindigi joǵary ekenin áý basta boljap qoıǵan.
Sý doby sheberleri dodasyna aıtarlyqtaı kóp komanda qatysqan joq. Erler arasyndaǵy básekede bar bolǵany alty komanda kim myqtyny anyqtasa, qyzdar arasyndaǵy synda bes komanda topqa tústi.
Spartakıada qorytyndysynda erler arasyndaǵy jarysta almatylyqtar qarsylastarynyń barlyǵynan aılasyn asyryp, chempıon atansa, Jambyl oblysynyń komandasy kúmis júldeger atandy. Al qaraǵandylyqtar úzdik úshtikti túıindedi.
Áıelder arasyndaǵy synda Jambyl oblysynyń komandasy qarsylastarynyń barlyǵynan basym túsip, kezekti márte ózderiniń shyn myqty ekenin dáleldese, almatylyqtar kúmis, elordalyqtar qola júldeni ıelendi.
Sondaı-aq spartakıada aıasynda ótken dzıýdoshylar básekesinde de óz salmaqtarynyń úzdikteri anyqtaldy.
Jambyl oblysy
