Ýnıversıadanyń saltanatty ashylý rásiminde Ǵylym jáne joǵary bilim vıse-mınıstri Qýanysh Erǵalıev mınıstr Saıasat Nurbektiń arnaıy quttyqtaýyn oqyp berdi.
«Bilimdi, tárbıeli, deni saý urpaq – elimizdiń baılyǵy! О́skeleń urpaqty patrıottyq rýhta tárbıeleýge sporttyq jarystardyń yqpaly zor dep esepteımin jáne osy baǵytta jumys istep júrgen joǵary oqý oryndaryna, oqytýshylarǵa alǵys aıtamyn. Aldaǵy ýaqytta barshańyzǵa sportta ǵana emes, oqýda da elimizdiń ıgiligine baǵyttalǵan tabystar men joǵary jetistikter, Ýnıversıada saıystaryna ádil tóreshilik, sportshylarǵa jeńis, qatysýshylar men uıymdastyrýshylarǵa sáttilik tileımin» delingen quttyqtaýda.
Qýanysh Asylhanuly toǵyzqumalaq, fýtzal, shahmattan Ýnıversıada jarystaryn tamashalady. Sondaı-aq baspasóz máslıhatyna qatysyp, bul doda tek stýdentter úshin ǵana emes, búkilhalyqtyq máni zor is-shara ekenin aıtty. Ult densaýlyǵyn nyǵaıtý jáne buqaralyq sportty damytý máseleleri memleketimizdiń aldynda turǵan mańyzdy mindetterdiń biri ekenin jetkizdi.
Qazirgi tańda jarys kestesi boıynsha ústel tennısi, júzý jáne jeńil atletıkadan jeńimpazdar anyqtalyp qoıdy. Medal kórsetkishi boıynsha jalpykomandalyq esepte M.Qozybaev atyndaǵy Soltústik Qazaqstan ýnıversıteti, Ál-Farabı atyndaǵy Qazaq ulttyq ýnıversıteti, D.Serikbaev atyndaǵy Shyǵys Qazaqstan tehnıkalyq ýnıversıteti kósh bastap tur.
Jambyl óńirindegi buqaralyq sportty damytý maqsatynda kelesi, ıaǵnı 2025 jylǵy HIII jazǵy ýnıversıadany ótkizý kezegi M.H.Dýlatı atyndaǵy Taraz óńirlik ýnıversıtetine berildi.
Aıta keteıik, 28 shilde – 8 tamyzda Dúnıejúzilik jazǵy ýnıversıada Chendý qalasynda ótedi, sonymen qatar bıyl elimizde Túrki stýdentter oıyny ótedi dep josparlanyp otyr.
