Búginde atalǵan keshen Sarqan aýdanynda. Halyqqa mamandandyrylǵan medısınalyq kómektiń qoljetimdiligin jaqsartý úshin qolǵa alynǵan ıgilikti iske turǵyndar dán rıza. Bir jyl ishinde medısınalyq keshen barlyq eldi mekendi aralaýdy maqsat tutyp otyr.
«Áleýmettik medısınalyq saqtandyrý qory» KeAQ Jetisý oblysy boıynsha fılıalynyń málimetinshe, keshen barlyq qajetti dıagnostıkalyq apparatpen jabdyqtalǵan: rentgen, ýltradybystyq, stomatologııalyq elektrokardıograf, kóz qysymyn ólshegish jáne basqa zerthanalyq jabdyqtar. Terapevt, gınekolog, hırýrg, kardıolog, stomatolog, ýltradybystyq dáriger, okýlıst, nevropatolog sııaqty bilikti mamandar toby shalǵaıdaǵy eldi mekenderdiń turǵyndaryna sapaly medısınalyq kómek pen keńes beredi.
«Jyljymaly medısınalyq keshen aýyl turǵyndarynyń basym bóligin qamtýǵa jáne kórsetiletin qyzmetterdiń sapasyn arttyrýǵa múmkindik beredi. Aýrýdy erte anyqtaýǵa, olardy keń kólemde emdeýge jáne jalpy halyqtyń densaýlyǵyn jaqsartýǵa kómektesedi. Shalǵaıdaǵy eldi mekenderdiń turǵyndaryna ýltradybystyq, flıýorografııa, EKG sııaqty zertteýlerdi aýdan ortalyǵyna barmaı-aq júrgizýge bolady. Halyq úshin bul – úlken artyqshylyq», deıdi nevropatolog dáriger Jańabek Kanalbekov.
Jalpy, praktıka dárigeriniń kabınetinde pasıent tekseriledi, qan aınalymy, tynys alý, endokrındik, as qorytý júıesi aýrýlarynyń, qan jáne gemopoez organdarynyń, sondaı-aq basqa da organdar men júıelerdiń qaýip faktorlary anyqtalady, qajetti emdeý taǵaıyndalady, salaýatty ómir saltyn nasıhattaý jáne qalyptastyrý boıynsha profılaktıkalyq is-sharalar júrgiziledi. Al sozylmaly ınfeksııalyq emes aýrýlary bar dınamıkalyq baqylaýdaǵy adamdarǵa medısınalyq keshenniń zerthanalyq-dıagnostıkalyq resýrstaryn paıdalana otyryp, dınamıkalyq monıtorıngin retteıtin normatıvtik-quqyqtyq aktilerge sáıkes bilikti medısınalyq kómek kórsetiledi.
Fýnksıonaldyq dıagnostıka kabınetinde: ish qýysynyń, qalqansha beziniń ýltradybystyq zertteýi, ınterpretasııamen júrekti elektrokardıografııalyq zertteý júrgiziledi. Akýsher-gınekologtiń kabınetinde áıelderdiń nysanaly tobyn bastapqy tekserý, Pap-test, isik patologııasyn anyqtaý úshin sút bezderin tekserý júrgiziledi.
Zerthanalyq dıagnostıka kabınetinde qandaǵy glıýkoza, holesterın deńgeıin anyqtaý, qan trıglıserıdteri boıynsha zertteýler júrgizedi, bıohımııalyq zertteýler: jalpy, tikeleı bılırýbın, alanınamınotransferaza, aspartatamınotransferaza, kreatının, mochevına, jalpy aqýyz, kalıı, natrıı, zárdiń jalpy klınıkalyq taldaýy jasalady. Rentgenogramma kabınetinde týberkýlezdi, ókpe isikterin jáne basqa da sozylmaly aýrýlardy dıagnostıkalaý maqsatynda tekserý júrgizý úshin sıfrlyq flıýorograf paıdalanylady.
«Bizdiń aýyl aýdan ortalyǵynan alys ornalasqan. Men kópbalaly anamyn jáne osyndaı jyljymaly medısınalyq pýnktte tekserýden ótý óte yńǵaıly. Úıden alys ketpeı, ish qýysynyń ýltradybystyq zertteýin jasattym, odan ári emdelýge joldama aldym», dep oıymen bólisti Qarabóget aýylynyń turǵyny.
Esterińizge sala keteıik, jyljymaly medısınalyq keshende tekserýden ótý úshin dárigerdiń joldamasy qajet emes. Bul keshende medısınalyq kómek tegin medısınalyq kómektiń kepildik berilgen kólemi jáne saqtandyrylǵan azamattarǵa mindetti áleýmettik medısınalyq saqtandyrý júıesi sheńberinde tegin kórsetiledi. Aıta keteıik, Sarqan aýdanynda 40-qa jýyq eldi meken bar. Turǵyndarǵa ortalyq aýdandyq aýrýhanadan basqa 7 dárigerlik ambýlatorııa, 4 feldsherlik-akýsherlik jáne 14 medısınalyq pýnkt qyzmet kórsetedi.
Saqtandyrý mártebesi men medısınalyq qyzmetterdiń sapasyna qatysty suraqtar týyndaǵan jaǵdaıda emhananyń pasıentterdi qoldaý qyzmetine, sondaı-aq áleýmettik medısınalyq saqtandyrý qoryna fms.kz resmı saıty, 1414 baılanys ortalyǵy, Qoldau 24/7 mobıldi qosymshasy men Telegram-daǵy SaqtandyryBot baılanys arnasy arqyly júginýge bolady.
Jetisý oblysy
