Prezıdent Qasym-Jomart Toqaev Iаnýsh Voıchehovskııge Astana halyqaralyq forýmyna spıker retinde qatysqany úshin alǵys aıtty.
«Bizdiń elimizben aıryqsha baılanysyńyz bar ekenin bilip, tańǵaldym. Qadirli anańyz Ekinshi dúnıejúzilik soǵys jyldary Qazaqstanda ómir súripti. Sondyqtan sizdiń saparyńyzǵa óte qýanyshtymyz. Elimizde polıak dıasporasy turady. Ári bizdiń ortaq mádenı muramyz bar. Benedıkt Polıak, Adolf Iаnýshkevıch, Gýstav Zelınskıı, Aleksandr Zataevıch sekildi tulǵalar Qazaqstannyń mádenı damýyna eleýli úles qosty», dedi Memleket basshysy.
Qasym-Jomart Toqaev Qazaqstannyń iri saýda seriktesi sanalatyn Eýropalyq Odaqpen yntymaqtastyqtyń strategııalyq sıpatyna nazar aýdardy.
«Jaqynda Qyrǵyzstanda «Ortalyq Azııa – Eýropalyq Odaq» jańa formatynda kezdesý ótkizdik. Buǵan deıin Astanada birinshi kezdesý bolǵan. Sondyqtan tyǵyz qarym-qatynas jasaý jónindegi nıetimiz ben umtylysymyzdy kórsetý úshin joǵary deńgeıdegi osyndaı kezdesýlerdi ótkizip turý kerek. Bıyl jyl basynda Eýropalyq Odaqpen dıplomatııalyq qarym-qatynas ornatqanymyzǵa 30 jyl toldy. Eýropalyq Odaqpen ózara baılanysymyzdy nyǵaıtýǵa mol múmkindik bar», dedi Prezıdent.
Qasym-Jomart Toqaev Eýrokomıssarǵa Qazaqstanda júrgizilip jatqan reformalar, sondaı-aq demokratııany damytýǵa, adam quqyqtaryn qorǵaýǵa jáne qoǵamda zań ústemdigin ornatýǵa septigin tıgizetin ózerister týraly aıtty.
Memleket basshysy Qazaqstannyń Eýropalyq Odaqpen aýyl sharýashylyǵy salasyndaǵy yntymaqtastyqty keńeıtý úshin zor áleýeti bar ekenine toqtaldy. Onyń aıtýynsha, elimiz dándi jáne maıly daqyldardy, sondaı-aq joǵary sapaly organıkalyq ónimderdiń eksportyn arttyrýǵa daıyn.
