Uıymdastyrýshy taraptyń mundaǵy maqsaty – qazaq jerindegi dalalyq qala mádenıetiniń eren úlgisi hám qazirgi astanamyzdyń «atasy» Bozoq qalashyǵynyń zerttele bastaýynyń 25 jyldyq datasyna oraı, onyń tarıhı- mádenı mańyzyn nasıhattaý jáne halyqaralyq TÚRKSOI uıymynyń qurylǵanyna 30 jyl tolý qurmetine tartý eken.
Bozoq qalashyǵy hronologııalyq turǵydan: ejelgi túrik ǵıbadathanasy, ortaǵasyrlyq qalashyq, Altyn Orda kezeńiniń qorymy, stasıonarlyq turǵyn úıler, óndiris oryndary, qazaqtardyń qystaýy jáne sýarý júıesinen turady. Sonymen qatar qalashyq materıaldary tórt ortaǵasyrlyq memlekettik qurylymdardyń tarıhyn kórsetedi: Túrik qaǵanaty, Qypshaq handyǵy, Altyn Orda jáne Qazaq handyǵy. Iаǵnı qalashyq VII-IX ǵasyrlardan XVI-XVII ǵasyrlarǵa deıin ejelgi túrkilerdiń kıeli orny, odan keıin kerýen saýdasyn baqylaıtyn qypshaqtardyń qonysy boldy degen boljam bar. Al XIV ǵasyrda qalashyq Nura-Esil aımaǵynyń ıslamdanǵan elıtasynyń rýhanı ortalyǵyna aınalyp, dinı-memorıaldyq keshen qalyptasypty. XVIII-XIX ǵasyrlarda munda qazaqtyń sharýashylyq nysandary (qystaýlar) ornalasqan kórinedi.
Alda atap ótilýge tıis Astana qalasynyń 25 jyldyq mereıtoıy qarsańynda uıymdastyrylyp otyrǵan bul sharany «At-travel» at klýbynyń shabandozdary qolǵa alypty. Osylaı Bozoqtan bastalǵan sapar Ulytaý jerinde, naqtyraq aıtqanda Ulyq ulystyń negizin qalaýshy Joshy hannyń kesenesi aýmaǵynda tizgin tartpaq.
Iаǵnı salt attylar elorda irgesindegi ejelgi qonys Bozoqtan attanyp, Uly dala tarıhynyń kindigi Ulytaýǵa deıingi saparyn bir aptaǵa josparlap otyrǵan kórinedi. Atalǵan ekspedısııanyń beldi múshesi ári jýrnalıst Erjan Jaýbaımen habarlasqanymyzda, «Saparǵa jaramdy arqaly attardy tańdap minip, segiz shabandoz elordadan jolǵa shyqtyq, bizge qosylý úshin taǵy bir tórt salt atty Ulytaýdan attandy. Buıyrsa, qos tarap Alǵabas aýylynda túıisip, ári qaraı Joshy kesenesine birge jol tartamyz. Jolaı halqymyzdyń tarıhyna qatysy bar nysandarǵa at basyn buryp, ony nasıhattaý sharalaryn qarastyramyz», dedi.
