Jer betindegi eń baı adamdardyń jıyntyq múlki 3,6 paıyzǵa azaıyp, 83 trln dollardy quraǵan. «Bul – on jylda makroekonomıkalyq jáne geosaıası belgisizdikten týyndaǵan eń úlken qysqarý», dep jazdy «Capgemini» fransýz konsaltıng fırmasy. Kompanııanyń qarjy sarapshylary 71 eldegi múliktik jaǵdaıdy taldady. Onyń málimetinshe, múliktiń eń kóp sany – 7,4 paıyz Soltústik Amerıkada qysqarǵan. Eýropada mınýs 3,2, al Azııa men Tynyq muhıty aımaǵynda 2,7 paıyz deńgeıinde tirkeldi. Sonymen birge Afrıka, Latyn Amerıkasy jáne Taıaý Shyǵysta múlik kerisinshe ósti. Buǵan Reseıdiń Ýkraınaǵa qarsy soǵysy aıasynda munaı men gaz baǵasynyń ósýi sebep bolǵan.
«Capgemini» qarjylyq zertteýler bóliminiń basshysy Elıas Ganem mıllıonerlerdiń azaıýy men aksıonerlik bırjalardaǵy jaǵdaı arasynda tikeleı baılanys bar dep sanaıdy. О́tken jyly amerıkalyq «NASDAQ» ındeksi – 33, fransýzdyq «CAC 40» – 9,5, al nemistiń «DAX»-i 12 paıyzdy joǵaltty.
Qazaqstandaǵy mıllıoner kásipkerlerdiń óńirler boıynsha sany birkelki emes. Tabysy 1 mln teńgeden kóp, barlyq tirkelgen, ózin-ózi jumyspen qamtýshylardyń 89 paıyzy almatylyqtar (5,3 myń adam) boldy. Taǵy 9 paıyzy, ıaǵnı 541 adam Astana qalasy men Aqmola oblysynda turady. О́te az úles (shamamen 2%) Mańǵystaý jáne Ulytaý óńirlerinde. Basqa óńirlerde mıllıondaǵan tabysy bar ózin-ózi jumyspen qamtyǵandar joq.
Sanattaǵy barlyq azamattardyń 95,1 paıyzy qala turǵyndary (5,7 myń adam) bolyp shyqty. Tek 293 adam (4,9%) aýylda kásippen aınalysyp, 1 mln teńge tabysqa qol jetkizgen.
Shveısarııalyq «Credit Suisse» bankiniń álemniń ártúrli elderindegi ál-aýqat deńgeıi týraly «Global Wealth Report 2022» analıtıkalyq esebiniń derekterine súıensek, 2021 jyldyń sońyna qaraı Qazaqstandaǵy dollarlyq mıllıonerlerdiń úlesi respýblıkanyń eresek turǵyndarynyń 0,3 paıyzyn qurady. Absolıýtti túrde bul 36,9 myń adam. 2020 jylmen salystyrǵanda mundaı deńgeıdegi qazaqstandyqtardyń sany 50,9 paıyzǵa ósti. Pandemııanyń birinshi jylynda baılyǵyn mıllıondaǵan dollarmen ólsheıtin baılar, derekkózge súıensek, elde 24,5 myń adam bolǵan.
