Mádenı sharaǵa óńir basshysynyń birinshi orynbasary Nurjan Kalenderov qatysyp, erdiń jasy elýge tolǵan kompozıtorǵa oblys ákimi Nurjan Nurjigitovtiń quttyqtaý hatyn tabystap, óner ıesiniń ıyǵyna zerli shapan japty. Sondaı-aq kompozıtorǵa «Oblysqa sińirgen eńbegi úshin» tósbelgisin tapsyrdy.
Kompozıtordyń shyǵarmashylyq keshine arnaıy kelgen óner álemindegi ini-qaryndastary Sársenbek Bákirdiń jurt jadynda qalǵan tamasha týyndylaryn shyrqap, izgi tilekterin aıtyp, estelikterimen bólisti. Konsertte óner kórsetý úshin Áýlıeataǵa arnaıy at basyn burǵandardyń qatarynda áıgili «MýzArt» ansambli, Muqasan Shahzadaev, Dosymjan Tańatarov, Qurmash Mahan bastaǵan ózge de belgili ánshiler bar. Kompozıtor keshiniń joǵary deńgeıde ótýine jergilikti ónerpazdar da súbeli úles qosty.
Shyǵarmashylyq kesh barysynda Sársenbektiń tólqujatyna aınalǵan «Aýzynan aıdyń túsken qyz» áninen bastap, ónersúıer qaýym arasynda keń taraǵan «Ne paıda?», «Sezimdi qaıtem týlaǵan», «Soǵady sen dep júregim» sekildi týyndylary da shyrqaldy. Sondaı-aq Dinmuhamed Qonaevqa arnalǵan «Taý tulǵa» atty áni alǵash ret qalyń kópshilik aldynda oryndaldy.
Belgili kompozıtordyń mereıjasyna oraı uıymdastyrylǵan konsert barysynda «Qonaev qory» qoǵamdyq qorynyń ókili Japar Kúzdeýbekov, ardager Dosmurat Shahzadaev, Talas aýdandyq máslıhatynyń tóraǵasy Qadirbek Sadýbaev óner ıesine qurmet kórsetti. Bul kúni kompozıtorǵa Qonaev atyndaǵy medal tabystalyp, Qazaqstan kompozıtorlar odaǵynyń múshelik kýáligi tapsyryldy.
Konsert óterden bir kún buryn Sársenbek Bákirdiń 50 áni toptastyrylǵan «Sezimdi qaıtem týlaǵan» atty jańa jınaq ónersúıer qaýymǵa tanystyryldy. Osylaısha erdiń jasy elýdi belgili kompozıtor qos qýanyshpen qarsy aldy.
TARAZ
