Ekochellendj aıasynda Aqmola oblysynyń Zerendi aýdanyndaǵy Qyzyl Kordon aýylynda «Birgemiz» respýblıkalyq volonterler front-ofısi jobasyn iske asyrýshy «Ulttyq volonterlik jelisiniń» jazǵy mektebiniń volonterleri men Qyzyl Kordon mektebiniń ujymy men oqýshylary aksııa ótkizdi. Olar bilim oshaǵy aýlasyna aǵashtar otyrǵyzyp, sýaryp, tazalyq jumystaryn júrgizdi. Sondaı-aq olar aımaqtaǵy ormandy qoqystan tazartty.
– Bul biz úshin zor tájirıbe boldy. Volonterlermen bizdiń qyzmetkerler, oqýshylar tanysyp, bir-birimen aqparat almasty, kóp nárse úırendi. Bizdiń jetekshiler volonterlerge aǵashty qashan jáne qalaı otyrǵyzý kerek, baptaý joldary qandaı ekenin aıtyp berdi. Aldaǵy ýaqytta da kómek berýge daıyn. Mundaı sharalar ekologııalyq ál-aýqatty jaqsartyp, óskeleń urpaqty tabıǵatty qurmetteýge tárbıeleıdi. Sondyqtan ekoaksııalar júrgizilip jatqanyna qýanyshtymyn, – dedi Qyzyl Kordon mektebiniń dırektory Natalıa Soboleva.
Jalpy, chellendjdiń maqsaty – qoǵamda ekologııalyq mádenıetti qalyptastyrý, tabıǵatty qorǵaý, saqtaý jáne aıalaýdy nasıhattaý. Bir apta buryn bastalǵan is-shara 20 maýsymǵa deıin jalǵasady. Oǵan barlyq nıet bildirýshi qatysa alady. Arasynda kreatıvti ıdeıasy bar, tapsyrmalardy tolyq oryndaǵan, «ekologııalyq» qaǵıdattardy saqtaǵan jandar iriktelip, jeńimpaz anyqtalady.
