Mınıstrliktiń baspasóz qyzmeti usynǵan aqparatqa sáıkes, órt bastalǵan kezde Ilın Soltústik Qazaqstan oblysynda bolǵan.
«Bul shyndyqqa sáıkes kelmeıdi, sebebi 8-9 maýsymda ol jumys saparymen Soltústik Qazaqstan oblysyna barǵan. Jumys saparynyń birinshi kúni Ilın oblys ortalyǵy mańynda salynyp jatqan TJD órt sóndirý qyzmetiniń jedel-qutqarý bólimsheleriniń keshenin jáne Petropavldaǵy Bereke shaǵyn aýdanyndaǵy órt sóndirý kesheniniń qurylys alańynda boldy», dep habarlady Tótenshe jaǵdaılar mınıstrligi.
Málim bolǵandaı, ekinshi kúni burynǵy mınıstr oblys turǵyndarymen kezdesý ótkizdi.
«Kezdesý barysynda mınıstr BAQ ókilderine brıfıng ótkizip, úkimettik emes uıymdardyń ókilderimen kezdesti. Onda vedomstvo jumysy, azamattyq qorǵaý júıesiniń damý perspektıvalary qaraldy. Sonymen qatar ol azamattardy jeke qabyldap, suraqtaryna jaýap bergen.
Bul kezdesý Memleket basshysynyń «Ortalyq atqarýshy organdar basshylarynyń halyqpen kezdesýlerin ótkizý týraly» Jarlyǵyna sáıkes ótkizilip, bekitilgen keste boıynsha aldyn ala habarlanǵan. Aıta ketý kerek, jıynǵa Petropavl qalasynan ǵana emes, jaqyn mańdaǵy aýdandardan da 200-ge jýyq adam qatysyp, kezdesý týraly aldyn ala habardar bolǵan. Bul rette jıynǵa oblystyń aýdany onlaın-translıasııa arqyly qosylyp, oǵan da 150-ge jýyq adam qatysty. Sonymen qatar jeke qurammen de kezdesý ótkizildi, oǵan azamattyq qorǵaý organdarynyń 180 qyzmetkeri qatysty», dep túsindirdi mınıstrlik.
TJM ókilderi Ilınniń Abaı oblysyndaǵy órtke baılanysty SQO-ǵa jumys saparyn toqtatqanyn da atap ótti.
Buǵan deıin órtke qatysty tergelip jatqan qylmystyq ister aıasynda burynǵy Tótenshe jaǵdaılar mınıstri Iýrıı Ilın, Ekologııa mınıstri Zúlfııa Súleımenova, sondaı-aq Abaı oblysynyń ákimi Nurlan Uranhaev pen Shyǵys Qazaqstan oblysynyń ákimi Danıal Ahmetovten jaýap alatyny belgili bolǵan edi.
