«Memlekettik nyshandardy jetildirý qajet. Qazir kez kelgen eldiń yqpaldy bolýyna ulttyq brendtiń áseri mol. Sondyqtan, onyń tanymaldyǵyn arttyra túsý kerek. Ol úshin biryńǵaı dızaın-kodty, ortaq standartty saqtaý óte mańyzdy. Nyshandarymyz biregeı ulttyq kodymyzdy naqty ári aıqyn kórsetýi kerek.
Men jaqynda Assambleıa sessııasynda elimizdiń Geraldıka belgilerin jetildirý qajettigi týraly aıttym. Aldymen aımaqtardyń jáne qalalardyń tańbasyn biryńǵaı úlgige keltirý kerek dep sanaımyn. Qazir olardyń kóbiniń mazmuny jáne pishini – árkelki. Soǵan baılanysty qoǵamda jıi syn da aıtylady. Bul salaǵa muqııat taldaý jasap, ortaq ustanymdar ázirleý qajet», dedi Prezıdent.
Sondaı-aq Memleket basshysy aımaqtyq nyshandardy ázirleý jáne bekitý tártibin barlyq óńirge birdeı etip, retke keltirý kerek ekenin atap ótti.
«Endi, memlekettik nagradalar máselesine jeke toqtalǵym keledi. Bul salanyń qalyptasqan ózindik dástúri bar. Elimizde kúndelikti qajyrly eńbegimen memleketimizdi órkendetýge jáne azamattardyń qaýipsizdigin qamtamasyz etýge mol úles qosyp júrgen jandar az emes. Olardyń qatarynda muǵalim, dáriger, ǵalym, kásipker, tártip saqshysy, áskerı qyzmetshi, qutqarýshy jáne basqa da mamandyq ıeleri bar. Qoǵamǵa úlgi bolatyn osyndaı jasampaz ári otanshyl jandardy memleket árdaıym qoldaýǵa tıis.
Men ózim bul máselege aıryqsha mán beremin. Sol sebepti, árbir orden-medaldyń tereń maǵynaly ári erekshe bolýy, jurt kóńilinen shyǵatyndaı bolýy óte mańyzdy. Sol úshin memlekettik marapattar júıesin halyqtyń janyna jaqyn ári túsinikti etip jasaý qajet», dedi Q.Toqaev.
Jýyrda memlekettik syılyqtarǵa halqymyzdyń birtýar perzentteriniń esimderi berildi. Ál-Farabı, Abaı, Ahmet Baıtursynuly atyndaǵy syılyqtar bar.
«Mundaı ustanym uly tulǵalarymyzdyń esimin el jadynda saqtaý úshin qajet. Sol arqyly biz olardyń ozyq oılary men ónegeli isterin dáripteımiz. Shyn máninde, ulttyq ıdeologııa osyndaı mańyzdy sheshimder arqyly qalyptasady.
Biz memlekettik nagradalar júıesin de osy tásilmen ózgertýimiz kerek. Kóptegen memlekettiń orden-medaldaryna kórnekti tulǵalardyń esimi berilgen. Mundaı qadamdar otanshyldyq rýhty asqaqtatý úshin qajet. Sondaı-aq tarıhta óshpes iz qaldyrǵan áıgili adamdardyń esimin urpaq sanasyna sińirý úshin kerek. Memlekettik nagradalar júıesin jetildirý kezinde bul tájirıbeni baıyppen paıdalanǵan jón», dep atap ótti Memleket basshysy.
Sondaı-aq Prezıdenttiń aıtýynsha, qoldanystaǵy keıbir ordenderdi halqymyzdyń birtýar perzentteriniń esimimen ataý máselesin oılastyrý qajet.
«Mysaly, Beıbarys Sultan jáne basqa da tarıhı tulǵalar atyndaǵy ordenniń ıegeri ataný kim-kimge de zor mártebe bolar edi. Men buǵan deıin «El birligi» atty jańa memlekettik nagrada ázirlep, bekitýdi tapsyrdym», dedi el Prezıdenti.
Aıta keteıik, bul marapat aldaǵy Respýblıka kúninde alǵash ret tapsyrylady.
«Kelesi jylǵy Respýblıka kúninde tarıhı tulǵalardyń atymen atalǵan ordenderdi tabystaımyz. Jyl sońyna deıin osy máseleni muqııat saraptap, naqty usynys engizý qajet. Prezıdent Ákimshiligi bul jumysty quzyrly memlekettik organdarmen, ǵalymdarmen jáne sarapshylarmen birge atqarady», dedi Q.Toqaev.
