Balýandarymyzdyń jeti júldesi

Statıstıkaǵa júginsek, Grand Slam týrnırinde Qazaqstan qu­rama koman­dasynyń músheleri jeti ret qana jeńis tuǵyrynyń eń bıik satysyna kóte­ril­gen eken. Bir altyn jáne tórt júl­deden artyq alǵan kezimiz joq. Bul joly ánuranymyz bir-aq márte shyr­qal­ǵa­nymen, medal sany mol boldy. Sonyń nátıjesinde Astanadaǵy doda­­nyń jal­py komandalyq esebinde jerles­termiz tórtinshi orynǵa taban tiredi. Al­dy­myzda – Ispanııa (2 altyn+1 kú­mis+2 qola), Italııa (2+0+0) jáne Fran­sııa (1+2+4) quramalary. Úzdik bestikti Ja­ponııa (1+1+0) dzıýdoshylary túıindedi.

Qazaq eliniń betkeustar ba­lýan­dary arasynan atalǵan ja­rysqa tek Eldos Smetov (60 kılo) pen Ábıba Ábýjaqynova (48 kılo) ǵana qatyspady. Olar áli de eski jaraqattarynan tolyqtaı aıyqpaǵan kórinedi. Sol sebepti qos sańlaq bul týrnırden bosatyldy. Azııa oıyndarynyń jeńimpazy Dıdar Hamza da (90 kılo) bul joly boı kórsetken joq. Qalǵan myqtylardyń tórt kózderi túgel boldy.

Bizdiń dzıýdoshylar arasynan Maǵjan Shamshadın asqan she­berlik tanytty. Ol 2015 jy­ly jastar arasynda álem chempıony atanǵanda qýanbaǵan qa­zaq joq edi. Sol kezde bilikti bap­­kerlerdiń ózderi «Bul bala­nyń bolashaǵy jarqyn» desip jat­ty. Biraq bári biz kútkendeı bolmady. Eresekter dýynda Maǵ­janǵa ózin moıyndatý qıynǵa soqty. Syr boıynyń saıyp­qyrany uzaq ýaqyt boıy dúbirli dodalarda úzdikter sanatynan kórine almady. Al osy joly ol keremet óner kórsetti. 60 kılo sal­maqta synǵa túsken Shamsha­dın ázerbaıjandyq Nádir Talı­bov, ózbekstandyq Bahrom Bo­tý­­rov, tájikstandyq Merzod Sý­fıev jáne fransııalyq Sed­rık Revol­dy utyp, jeńis tuǵyry­nyń eń bıik satysyna kóterildi.

66 kılo salmaqta kúresken Ǵus­man Qyrǵyzbaev aqtyq syn­­ǵa deıin alqynbaı jetti. Tu­saýs­ker kezdesýinde soqyr je­rebe ony reseılik Iаgo Abý­lad­­­ze­men jolyqtyrdy. Dál osy ba­lýan­nan qanda­symyz 2021 jy­ly Býdapeshte ótken álem chem­pıona­tynyń fınalynda utylǵan edi. Bul joly Ǵusman ketken eseni qaıtaryp, ataqty qarsylasyn golden-skorda alyp urdy. Odan keıin mońǵolııalyq Narmandah Baıanmuńh, ázerbaıjandyq Kam­ran Sýleımanov jáne ózbek­stan­dyq Muhıddın Tılovov­ty tize búktirdi. Fınalda Qyrǵyz­baevtyń ıspanııalyq Garsııa Tor­nege áli jetpedi.

Taǵy bes jerlesimiz jeńis tuǵyry­nyń úshinshi tuǵyryna kóterildi. 73 kılo salmaqtyń qola medalin Jansaı Smaǵulov pen Danııar Shamshaev ózara sarapqa saldy. Ekeýiniń jas aıyr­mashy­lyǵy – baqandaı toǵyz jas. Jan­saı – 30-da, Danııar – 21-de. Bul básekede jas jolbarystyń mysy basym boldy. Sheshýshi tusta shıraq qımyldaǵan Shamshaev qarsylasynyń sál kádirip qalǵan sátin utymdy paıdalanyp, Sma­ǵulovqa san soqtyryp ketti. Osy salmaq dárejesiniń ekinshi qola medali Asqar Narqulovqa buıyrdy. Kúni búginge deıin kózge túspeı, álemdik reıtıngte TOP-100-dikke ene almaı júrgen 23 jastaǵy qazaq balýany Astana tórinde ózin jaqsy qyrynan kórsetti. Ol ulybrıtanııalyq Olıver Short, IJF-tiń tiziminde 12-orynda turǵan ózbekstandyq Shahram Anadov, Eýropa chempıony, kosovalyq Akıl Gıakova jáne jastar arasyndaǵy álem birinshiliginiń kúmis júlde­geri, grýzııalyq Georgıı Terashvı­lıden basym tústi. Bul – ázirge Asqardyń sporttyq mansabyn­daǵy eń qomaqty tabys.

100 kılo salmaq dárejesiniń qola júldesi úshin qazaqtyń qos qyrany talasty. Alǵashqysy – eki birdeı Olımpıadaǵa qa­ty­syp, Azııa oıyndary men chem­pıonatynda júldegerler qa­ta­ryna qosylǵan 32 jastaǵy Is­lam Bozbaev. Ekinshisi – jas­ós­pirimderdiń Dúnıejúzilik Ýnıversıadasynyń jeńimpazy, 22 jastaǵy Bekarys Sádýaqas. Bul tartysta saqa sportshynyń mereıi ústem boldy. Elimizdiń erler quramasynyń qorjynyna taǵy bir qolany Ǵalymjan Qy­ryqbaı saldy. Alyptarmen aı­qasqan qazaqtyń nar tulǵaly jigiti sheshýshi tusta jastar ara­syn­daǵy álem chempıony, grýzııa­lyq Saba Inaneıshvılıdi qos jaýyrynymen jerge qadady.

Áıelder arasyndaǵy jarys­ta asa jeńil salmaqtaǵy Ǵalııa Tynbaeva qola medal úshin tar­tysta jeńilis tapqan­nan keıin endi bizge júlde buıyr­maı­tyn shyǵar dep oıladyq. Aıtqandaı-aq, tatamıge shyqqan burymdylarymyz birinen keıin biri utylyp jatty. Alaı­da ja­rys­tyń sońǵy kúni Aqer­ke Rama­zanova jergilikti kórermen­derdi bir qaýan­typ tastady. 22 jastaǵy qazaq qyzy bastapqy eki básekede álemdik reıtıngte ózinen álde­qaıda joǵary turǵan eki qarsy­lasynan basym túsip, jartylaı fınalda nıderlandtyq Marıt Kapske jol berdi. Odan keıin fransııalyq Karen Stıvensondy oısyrata utyp, qola medaldi moınyna ildi. Dál sol Stıvenson sonyń aldynda ǵana bizdiń Ká­mılıa Berliqashty jolynan yǵys­tyrǵan edi.

 «Qazaqstan Barysy Grand Slam 2023» týrnıriniń deńgeıi joǵary bolǵany sonshalyq, ataǵy alysqa jaıylǵan balýandardyń keıbiri júldege qol jetkize almaı, el­de­rine eńseleri ezilip qaıtty. Olar­­dyń qatarynda Olım­pıa­­­da chem­­pıondary – Fa­bıo Ba­zı­le (66 kılo), Hasan Qal­mur­zaev (81 kı­lo), Pınot Margo (70 kılo), Olım­pıadanyń kúmis júl­degeri, álem chempıo­ny Gý­ram Týshıshvılı (+100 kı­lo), Olım­pıadanyń kúmis jáne álem chempıonatynyń bes dúr­kin júldegeri Telma Manteıro (57 kılo), álem chempıony Iаgo Abýlad­ze (66 kılo), álem chempıo­na­ty­nyń júldegerleri – Hýsseın Qalmurzaev (90 kılo), Toma Nı­kıforov (100 kılo), Ýshangı Kokaýrı (+100 kılo) jáne taǵy bas­qa saqa sportshylar bar.