Kollajdy jasaǵan Qonysbaı ShEJIMBAI, «EQ»
Indýstrııa jáne ınfraqurylymdyq damý mınıstri Marat Qarabaevtyń aıtýynsha, óńirlerdegi avtobýs parkteri ábden tozǵan. Sondyqtan qarajatty solaı qaraı baǵyttaý týraly sheshim qabyldanypty.
«Birqatar óńirlerde, Taldyqorǵanda, Oralda boldyq. Jergilikti atqarýshy organ ókilderi negizinen avtoparktiń eskirýi máselesin kóteredi. Elimiz boıynsha 10 525 avtobýs bolsa, sonyń 45 paıyzy – eskirgen kólikter. Mysaly, Qostanaıda eskirý kólemi 90 paıyzǵa jetse, Taldyqorǵan men Oralda – 70 paıyz. Sondyqtan qolda bar qarajatty meılinshe tıimdi paıdalaný kerek bolyp tur. Osyǵan baılanysty qarjyny qoǵamdyq kólikti nesıeleýge baǵyttamaqpyz. Elimizde qoǵamdyq kólikti kún saıyn 9,3 mln adam paıdalanady. Bizdegi basty basymdyq – solardyń qajettiligin qanaǵattandyrý», dedi mınıstr.
Baǵdarlama aıasynda jeńildetilgen avtonesıe berýdiń nelikten toqtatylǵanyn vıse-mınıstr Ilııas Ospanov ta túsindirdi.
«Bizde eki baǵdarlama bar. Onyń birin – Qazaqstan Damý banki, ekinshisin – О́nerkásipti damytý qory daıyndaıdy. Endi О́nerkásipti damytý qory arqyly júzege asyrylatyn baǵdarlamaǵa ózgeris enedi. Bizdiń aldymyzda qarajatty tıimdi paıdalanýdyń jolyn tabý týraly mindet turdy. Aqsha bar, biraq ol bárine jetpeıtin edi. Mindetimiz – kún saıyn qoǵamdyq kólikti paıdalanatyn 9,2 mln adamdy sapaly avtobýstarmen qamtamasyz etý. Jergilikti atqarýshy organdarmen jınalys ótkizip, usynystardy saraladyq. Qazirgi ýaqytta 2 myń avtobýsqa ótinim berdik. Sonyń teń jartysy Almaty ákimdiginen keldi», dedi Ilııas Ospanov.
О́nerkásipti damytý qorynyń habarlaýynsha, elde avtobýs satyp alýǵa arnalǵan nesıe baǵdarlamasy burynnan bar. Jumys istegen bes jyl ishinde 3,5 myńnan astam jańa avtobýs qosylǵan. Endi jeńildetilgen avtonesıe baǵdarlamasynan aýysqan qosymsha qarajat qoǵamdyq transport satyp alý júıesine tyń serpin beredi.
«Eger jeńildetilgen avtonesıe berý baǵdarlamasy boıynsha aı saıyn 120 adamdy mashınamen qamtamasyz etýge bolatyn bolsa, qarajatty qaıta bólgen jaǵdaıda bir aıda 15 myńǵa jýyq jolaýshy tasymaldaıtyn 20 avtobýs satyp alýǵa bolady. Jańa avtobýstar beınebaqylaý kameralarymen, beınejazba júıesimen, kondısıonerlermen, marshrýt kórsetkishterimen, múgedekterge arnalǵan mehanıkalyq pandýstarmen jabdyqtalǵan jáne jolaýshylardy qaýipsiz jáne jaıly tasymaldaýdyń barlyq talaptaryna laıyq jasalǵan. Sonymen qatar satyp alynatyn elektr avtobýstary men syǵymdalǵan gazben júretin avtobýstar atmosferaǵa zııandy zattardyń shyǵarylmaýy esebinen qalalardaǵy ekologııalyq jaǵdaıǵa tıimdi», delingen qordyń resmı habarlamasynda.
О́nerkásipti damytý qory basqarma tóraǵasynyń orynbasary Rınat Ǵapparovtyń aıtýynsha, jańa qarajattyń bólinýi arqasynda jylyna 700 avtobýsty jańartý múmkindigi týady.
Qoldanystaǵy avtobýstardy lızıngtik qarjylandyrý baǵdarlamasynyń sharttary: lızıngtik qarjylandyrý merzimi – 7 jylǵa deıin; lızıng boıynsha bastapqy jarna – lızıng nysanasy qunynyń keminde 15%-y; jyldyq syıaqy mólsherlemesi –7%.
Elimizde jyldyq 4 paıyzdyq jeńildetilgen avtonesıe baǵdarlamasy 2022 jylǵy 16 mamyrda bastalǵan. Alaıda bastalǵaly nesıege ótinim qabyldaıtyn platforma durys jumys isteı alǵan joq. 6 aqpanda qanatqaqty joba ótinim qabyldaı bastady, biraq jańa portaldyń jumys isteý uzaqtyǵy 18 sekýndqa ǵana sozyldy.
