«Amangeldi» fılmin 1938 jyly rejısser Moıseı Levın Ǵabıt Músirepov pen Beıimbet Maılınniń «Amangeldi» pesasynyń negizinde túsirgen. Alaıda keńestik senzýraǵa baılanysty kıno jaryq kórgende ssenarıin jazǵan qos jazýshynyń da aty atalmaıdy.
Kınotanýshy, professor Baýyrjan Nógerbek «Amangeldi» fılmin qazaqtyń emes Lenfılm túsirgen qazaqtar haqyndaǵy kıno deı kele onyń memlekettik tapsyryspen túsirilgenin aıtady. «Bul memlekettik, anyǵynda memlekettik-partııalyq tapsyrys bolatyn. Muny rastaıtyn qujattar saqtalǵan. Qazaqstan Úkimeti Ortalyqqa 1916 jylǵy ult-azattyq kóterilistiń jetekshisi, halyq batyry Amangeldi Imanov jaıly fılm túsirý týraly ótinish bildirgen. Totalıtarlyq bılik mıf jasaýǵa muqtaj bolatyn, al, ańyzǵa aınalǵan halyq batyry Amangeldiniń ómirbaıany olardyń bul maqsatyn oryndaýǵa saı kelip turdy. Sondyqtan «ótinish» jerde qalmady», deıdi. Osylaısha keńestik ıdeologııa «Amangeldi» fılmin orystardyń kómegimen túsirilgen qazaqtyń tuńǵysh fılmi dep sanamyzǵa sińirgen.
Bul ýaqytta qazaqtan shyqqan kásibı kıno mamandary joqtyń qasy edi. Sol sebepten de qazaq kınematografııasy boldy dep aıta almaımyz. Degenmen sodan keıin damý jolyna tústi. Baýyrjan Nógerbek tuńǵysh qazaq rejısseri týraly maqalasynda: «Sháken Aımanov qazaq kınosynyń úshinshi jańǵyrýy týraly ıdeıany alǵa tartty. Sebebi ishteı, «Amangeldi» fılmin tuńǵysh kıno retinde usynǵan tezıstiń osaldyǵyn, ǵylymı turǵydan obektıvti emesin sezinse kerek dep, onyń: «1953 jyly Gakkelmen birge túsirgen «Mahabbat týraly ańyz» fılmim, mańyzdy kezeń. Shyndyǵyn aıtqanda, bul osal fılm. Ony fılm dep aıtýdyń ózi artyq, bul Ǵ.Músirepovtyń «Qozy Kórpesh–Baıan sulý» pessasy boıynsha túsirilgen fılm-speaktakl. Degenmen, bul bizdiń úshinshi jańǵyrýymyz, sebebi, óz kúshimizben fılm túsire bastadyq. Ulttyq kınematografııa bastaldy», degen oıyn jetkizedi. Iаǵnı shyn máninde qazaqtyń tuńǵysh fılmi «Mahabbat týraly ańyz» deı alamyz.
Qozy Kórpesh pen Baıan sulýdyń mahabbat hıkaıasyn óz mamandarymyz ekranǵa shyǵardy. Rejısser bul týyndysyn álsiz dep baǵalasa da, sodan keıingi sátti túsirilgen qazaq fılmderiniń «bastaý-bulaǵy» boldy.
