Sezinemin dúnıe qarbalasyn,
Qazaǵymnyń súıemin ár balasyn.
Súımesińe bola ma árbir urpaq,
Týǵan halqyń – ǵumyryn jalǵaǵasyn!
Tartyp kelem taǵdyryn
túrli azaptyń,
Júregine jetsem dep bir Qazaqtyń.
Qaıǵyny, qasiretti arqaladym,
Taýqymet tarttym talaı,
muńǵa battym.
Tartynbaı, taǵdyr júgin sal ıyqqa...
Aınalsam dep Alataý aqıyqqa –
Jazsam da júz óleńdi, bálkim men de
Bir óleńmen qalarmyn tarıhta!
Ol bálkim – ómir jaıly óleń bolar,
Aqqýdaı aıdyn kólge menen qonar.
Saryarqa sary beldiń kıigindeı,
Dúr etip júregimnen jóneldi olar.
Bir óleń seni kútip kelem endi,
Qudiret sezim kúshi bólep eldi,
Ananyń aq sútindeı ýyz dámdi,
Men jazyp qaldyramyn sol óleńdi.
Ol óleń – ne jaıynda jumbaq maǵan,
Dúnıe táńirimdeı til qat maǵan.
Men úshin ár qazaqtyń baǵasy artyq,
Narqy artyp, ár kún saıyn qymbattaǵan.
О́lim – haq, adam kókti tiregenmen,
Tabysyp, toǵysatyn tilegi elmen.
Men ólmeımin, ómirde men tirimin,
Aıtylǵan, aıtylmaǵan – bir óleńmen.
Bilemin ǵumyr bolmas alda munsha,
Qaǵam qanat – qanatym talǵanynsha,
Men ólmeımin, ómirde men tirimin –
Jer betinde bir qazaq qalǵanynsha!
1994 jyl
Jıenshary Maǵjannyń...
(M.J. Ýtınge)
Tún balasy – shabyttyń túler shaǵy,
Aqynnyń túnde janar kileń shamy.
Kórshiles qudaı qosqan baldyzym bar,
Maǵjannyń – Mekesh degen jıenshary.
Qııanat ádiletpen arbasqandaı,
Taǵdyr bar tolǵaı alsań
san dastandaı...
Turady terezemiz qarsy qarap,
Maǵjannyń júregimen jalǵasqandaı.
Bala kez kórsetpeıdi kim ónerin,
Bilmeı sábı kenet bult túnererin.
Maǵjandaı naǵashy úshin taıaq jegen,
Mektepte aıtyp qalyp bir óleńin.
Qatygez zaman baryn naq baıqady,
Degen joq sol kezde de baq qaıtady.
Sol sábı taǵdyrynan taısalmastan,
Áli de Maǵjan jyryn jatqa aıtady.
Bas ıip halqym degen danasyna,
Qaıǵyryp keń qazaqtyń dalasy da,
Maǵjandaı naǵashysy bolǵany úshin,
Taýqymet tartty talaı anasy da.
Zamannyń moıynsunyp jarlyǵyna,
Kúıinip keń dúnıeniń tarlyǵyna,
Aqynnyń qoljazbasyn tyqty talaı,
San jyldar sarǵaıa ustap sandyǵyna.
Ádilet jeńis qurǵan baqqa jetip,
San taǵdyr taýqymetin attap ótip.
Toılady júz jyldyǵyn halqymenen,
Maǵjandaı naǵashysyn maqtan etip.
Taǵdyrdyń san zaýaly tónedi, átteń,
Ádilet arpalysyp keledi, átteń.
Keledi jerdi basyp bir azamat,
Uly aqyn jıenshary degen atpen.
2001 jyl
Shómishbaı Sarıev,
aqyn, Frans Kafka
atyndaǵy halyqaralyq
syılyqtyń laýreaty
