Ulttyq memlekettik ǵylymı-tehnıkalyq saraptama ortalyǵynyń habarlaýynsha, dúnıejúzilik naryqta tyǵyzdaǵysh jáne jelimdegish materıaldarǵa degen suranys ta, ony óndirýshiler de artyp keledi. Sońǵy analıtıkalyq zertteýlerdiń birinde germetıkter men jelimderge degen jahandyq suranys jylyna orta eseppen 5 paıyzǵa ósedi delingen. 2022 jyly suranys 2 mıllıon tonnany quraǵan. Jelimdegish zattarǵa qurylys ındýstrııasy, óńdeý ónerkásibi, elektronıka óndirisi jáne qaptama jumysynda suranys kóp. Ol kóbinese damýshy elderde baıqalady eken.
Marketıngtik taldaý kórsetkendeı, elimizdiń naryǵynda jelim ımportynyń úlesi óte joǵary. Qazirgi ýaqytta Qazaqstanda germetıkalyq jáne jelim materıaldaryn shyǵaratyn otandyq óndirýshi joq. О́z kezeginde qarqyndy damyp kele jatqan zamanaýı tásilder, qurylystaǵy, mashına jasaýdaǵy, avıasııalyq qurylystaǵy, sondaı-aq jóndeý jáne turmystyq qyzmet kórsetýdegi tehnologııalar qurylys hımııasynyń otandyq materıaldaryn óndirý qajettiligin týǵyzyp otyr.
Qaraǵandylyq ǵalymdar qanyqpaǵan karbon qyshqyldary men amıdteri bar qanyqpaǵan polıefırli shaıyrlardyń sopolımerleri negizinde aýa raıyna tózimdi jańa tyǵyzdaǵysh materıaldar men jelimder jasaý úshin ınnovasııalyq ázirlemelerdi usynyp otyr.
Otandyq ǵalymdar usynyp otyrǵan ınnovasııany qarý-jaraq oq-dárileri men artıllerııalyq qondyrǵylardy plombalaýdan bastap stanok jasaý men qurylystaǵy qurama buıymdar men metall konstrýksııalardyń túıispelerine deıin qoldanýǵa bolady.
Ǵylymı zertteý nátıjesinde mamandar qolda bar jáne arzan shıkizattan jańa tyǵyzdaǵyshtar men jelimder jasap, ımportty almastyratyn jańa ónimder men materıaldardy óndiriske engizbek. Bul elimizdiń mashına jasaý, qorǵanys jáne qurylys ónerkásibi kásiporyndarynda suranysqa ıe túpkilikti ónimniń ózindik qunyn tómendetýge septigin tıgizedi.
