О́ner ujymdary basshylarynyń basyn qosqan sharanyń negizgi maqsaty – Qazaqstannyń mádenıet salasyn kórkeıtý, sondaı-aq aldaǵy ýaqytta júzege asyrylýy tıis máselelerdi saralaý.
Semınarǵa tóraǵalyq etip, alǵashqy sóz tizginin alǵan Aqan Abdýalıev óz baıandamasynda búgingi tańda qordalanǵan máseleler tizbegin atap ótti.
Kún tártibinde repertýardaǵy ulttyq shyǵarmalardyń azdyǵy, tehnıkalyq mamandar jetispeýshiligi, artısterdi attestasııadan ótkizý, normatıvtik qujat, gonorar men qarajat máselesi, mereıtoılyq, dataly is-sharalarmen qatar, tehnıkalyq jabdyqtardyń álsizdigi jóninde qyzý talqylanyp, olardy ońtaıly sheshý joldary qarastyryldy.
Jıynǵa elimizdiń ár óńirinen kelgen konserttik mekeme basshylary arasynan jetekshi retinde biraýyzdan «Q.Baıjanov atyndaǵy Qaraǵandy konserttik birlestigi» QMQK basshysy Talǵat Ydyrysov taǵaıyndaldy.
Aldaǵy ýaqytqa josparlanǵan ortaq jumystar zaman talabyna saı bolýymen qosa, ulttyq qundylyqtardyń qaımaǵyn buzbaı iske asyrylýy qajettiligi jáne osy syndy birqatar talap-tilek aıtyldy. Semınarǵa qatysýshylar óner ujymdaryndaǵy aspaptardy jańartý, ózara shyǵarmashylyq qarym-qatynasty nyǵaıtý men nagradalaý jumystary, elimizdegi fılarmonııalardyń assosııasııasy men qoryn jáne ortaq elektrondy portalyn qurý, olardy sıfrlandyrý, jastarmen jumys isteýdegi olqylyqtardy túzetý, artısterge jáne ózge de qyzmetkerlerge arnalǵan sheberlik dáristerin kóbeıtý, mádenıet zańdaryna ózgerister engizý, sahna kostıýmderin jańartýǵa baılanysty usynystaryn bildirdi. Atalǵan sharada sóz alǵan «Dombyrashylar odaǵy» Respýblıkalyq qoǵamdyq birlestiginiń tóraǵasy Qanat Erjigitov fılarmonııalardyń beınebaıandary men gastroldik rolıkterin óz arnalarynda kórsetýge daıyn ekenin tilge tıek etti.
Saıyp kelgende, semınar qorytyndysy retinde sheshimin tabýǵa tıis kúrdeli máseleler men usynystar legi saralanyp, jıyn sońynda mekeme basshylary ózara memorandýmǵa qol qoıdy. Sondaı-aq sharany uıymdastyrǵan Jambyl atyndaǵy Qazaq memlekettik fılarmonııasynyń atynan estelik syılyqtar tabystaldy.
«Jalǵyzdyń aty, jaıaýdyń shańy shyqpas» degendeı, birlese jumys istep, birlikte áreket etýge baǵyttalǵan basqosý mádenıet pen óner salasyn órkendetip, damytý jolyndaǵy eleýli ózgeristerdiń, jarqyn isterdiń bastamasy bolady dep senemiz.
Gúlaıym JUMASh
