Memleket basshysyna kompanııanyń bıyl birinshi jartyjyldyqta atqarǵan operasııalyq jáne qarjylyq qyzmetiniń nátıjesi týraly esep berildi. Sondaı-aq «QazMunaıGaz» kompanııasy byltyrǵy osy kezeńmen salystyrǵanda barlyq negizgi kórsetkish boıynsha ósimge qol jetkizgeni baıandaldy.
«Maǵzum Myrzaǵalıev iri ınvestısııalyq jobalardyń júzege asyrylý barysy, atap aıtqanda, Atyraý oblysynda qýaty jylyna 1 250 myń tonna polıetılen óndiretin zaýyttyń jáne Mańǵystaý oblysynyń Jańaózen qalasynda jańartylatyn energııa kózderin paıdalaný arqyly jumys isteıtin gıbrıdti elektr stansııasynyń qurylysy jóninde aıtty», delingen Aqorda habarlamasynda.
Memleket basshysyna munaı óńdeý zaýyttarynyń jumysy, janar-jaǵarmaı materıaldary óndirisiniń qarqyny jáne olardyń qoryn qalyptastyrý týraly málimet berildi. Atap aıtqanda, «QazMunaıGaz» Fransııanyń Air Liquide kompanııasymen birlesip, Pavlodar munaı hımııasy zaýytynda 160 myń tonnaǵa deıin qysqy dızel otynyn óndirýge múmkindik beretin jobany iske asyrýǵa nıetti.
Kezdesý sońynda Qasym-Jomart Toqaev geologııalyq barlaý jumystaryn damytý jáne perspektıvti barlaý ýchaskelerin zertteý úshin iri ınvestorlar tartý jóninde birqatar tapsyrma berdi.
