Baýyrsaqty brend etýdi, ulttyq qundylyqtarymyzdy dáripteýdi maqsat tutqan «Bauyrsaq day» merekesine jańa rekordty tirkeýge «Qazaqstan rekordtar kitabynyń» resmı ókili Baqytjan Sábıtuly arnaıy keldi.
Bir jaǵynan osynaý is-shara – otbasy ınstıtýtyn damytýdy, demalys kúnderin mándi etýdi de kózdeıdi.
Baýyrsaq pisirý úshin 1600 kılo un jumsalyp, 5 qazan kóterilgen merekege Almatynyń eń myqty degen 40 aspazy jınaldy.
«Rekord jańartqan osynaý is-shara alǵash ret uıymdastyryldy. Baýyrsaq pisirý tús kezinde bastalyp, ystyq baýyrsaqtardy ólshep, shetinen elge taratyp jatyrmyz», deıdi uıymdastyrýshylar.
Baýyrsaq daıyndalyp jatqanda balalar da zerikpedi. Arnaıy josparlanǵan kóńildi baǵdarlamalarǵa qatysyp, ártúrli keıiptegi anımatorlarmen oınady. Betine, qolyna arnaıy mamandardyń kómegimen sýret saldyryp, estelik sýretterge túsip jatty.
«Qazaqstan rekordtar kitabynyń» resmı ókili Baqytjan Tastúbekov aldaǵy ýaqytta mundaı is-sharalardyń jıi bolyp turatynyn aıtty. Buǵan deıin 2017 jyly Taldyqorǵan qalasynyń kúnine oraı osyndaı is-shara uıymdastyrylǵan. Onda rekord 2000 kılo bolǵan.
«Nan bolsa, án de bolady» demekshi, qala turǵyndary men qonaqtaryna arnalǵan konsertti Álı Oqapov bastap berdi. Balaqaılar da óner kórsetti. Konsertti «Úrker» toby ulttyq naqyshtaǵy ánderimen merekeni keshki márege jetkizdi.
Keshki saǵat 20:30 shamasynda baýyrsaqtar tolyǵymen pisirildi. Uıymdastyrýshylar 2023 kılo baýyrsaq pisirýdi josparlaǵan, keıinnen salmaǵy 2047 kıloǵa jetken soń, rekord jańartyldy. 7 saǵattan asa jumys jasaǵan aspazdardyń maqsaty oryndaldy.
Baqytjan Sábıtuly Qazaqstan rekordtar kitabynyń resmı ókili retinde, 2047 kılo baýyrsaq pisirilip, jańa rekord tirkelgenin rastaı otyryp, uıymdastyrýshylarǵa kýálik tapsyrdy.
Qalalyqtar baýyrsaqtyń dámdi bolǵanyn, bala-shaǵamen birge demalyp, otbasylyq jyly oqıǵa bolǵanyn aıtyp, uıymdastyrýshylar men aspazdarǵa alǵysyn bildirdi. Ulttyq qundylyqtardy, ulttyq taǵamdarymyzdy dáripteıtin is-sharalardyń araǵa jyl salyp emes, mereke saıyn jalǵasyp turýyn tiledi.
Mádına QALI,
Ál-Farabı atyndaǵy Qazaq ulttyq ýnıversıtetiniń stýdenti
ALMATY
