Bir apta boıy kenshiler astanasynda 6 óńirdiń komandasy (Astana, Shymkent qalasy, Qaraǵandy, Mańǵystaý, Aqtóbe jáne Almaty oblysy) aınalmaly júıe boıynsha kim myqtyny anyqtady.
Sheshýshi týrda birden 3 komanda – Qaraǵandy, Aqtóbe men Shymkent gandbolshylary bas júldeden dámeli boldy. Jarys qojaıyny Astana qalasynyń komandasyn utyp (38-30), upaı sanyn 8-ge jetkizdi. Osydan keıingi Shymkent qalasy men Aqtóbe oblysynyń arasyndaǵy matchta alǵashqysy 33-22 esebimen jeńdi. Osylaısha, 3 komanda da birdeı 8 upaıdan jınady. Júldegerler dop aıyrmashylyǵy boıynsha ǵana anyqtaldy. Qaraǵandy oblysy jeńimpaz atansa (57-53), Shymkent qalasy kúmis (56-55), Aqtóbe oblysy (51-56) qola medalǵa ıe boldy.
«Osyǵan deıingi V jazǵy Spartakıada Qaraǵandy qalasynda ótken. Sol kezde 4 komandanyń arasynda (Qaraǵandy, Astana, Pavlodar men Atyraý) kenshiler chempıon atanǵan. Astana qalasy kúmis, Pavlodar oblysy qola alǵan. Bıylǵy jarystyń deńgeıi bir saty bolsyn kóterilgen. Sońǵy týrda 3 komandanyń birdeı upaı jınap, teń túsýi sonyń kórsetkishi», dep eske alady Astana qalasy komandasynyń bapkeri Vladımır Berezın.
Nebári 2 ret jeńiske jetken elordalyqtar bul joly 4-orynmen shekteldi. Jazǵy Spartakıadaǵa qatysyp jatqan jańa oblystyń biri Almaty 5-shi, al Mańǵystaý oblysy 6-satydan kórindi.
«Biz búgin qola medaldy mise tuttyq. Qalaǵanymyz bas júlde edi. Búgin Shymkent qalasymen nashar oınadyq. Ásirese, alǵashqy aınalymda. Tym kóp gol soqqyzyp alǵan soń aıyrmashylyq kóbeıip ketti. Nege bulaı bolǵanyn bilmeımin. Demek, áli daıyndyqty kúsheıtip, taǵy jumys isteý kerek. Endi Ulttyq quramamen Azııa oıyndaryna daıyndyq kútip tur. Quramanyń jýyrda jasaqtalǵanyna qaramastan jaqsy nátıje kórsetýge barymyzdy salamyz», dedi Aqtóbe komandasynda oınaıtyn Ulttyq qurama qaqpashysy Asylhan Nabıev Sportty damytý dıreksııasynyń baspasóz qyzmetine bergen suhbatynda.
Qazaqstan erler quramasy alda Qytaıdaǵy Azıada men Qatar astanasynda ótetin Parıj Olımpıadasynyń irikteý týrnırine qatysady.
