Sýretterdi túsirgen Erlan OMAR, «EQ»
Atalǵan kórme aqparat quraldarynyń ulttyq sana-sezimdi qalyptastyrýdaǵy rólin kórsetip, qalyptasýy men damý tarıhyn tanystyrady.
Usynylǵan ár kezeńdegi aqparat jabdyqtary, gazet-jýrnaldar tarıhtan syr shertedi.
Alqaly jıyndy ashqan Aqparat jáne qoǵamdyq damý mınıstri Darhan Qydyráli jınalǵan qaýymdy kásibı merekemen quttyqtady.
«Mereke qarsańynda jýrnalısterdiń kóńil kúıi erekshe dep oılaımyn. О́ıtkeni birer kún buryn Memleket basshysynyń tapsyrmasymen bir top BAQ qyzmetkerlerine páter kilti tabystaldy. Onyń ishinde uzaq jyldar boıy jemisti eńbek etip júrgen jýrnalıster, operatorlar, qarapaıym qyzmetkerler boldy. Memlekettiń bul qamqorlyǵy ári qaraı jalǵasa beredi. Keshe de Prezıdent syılyqtary tabystaldy. Biz osy salaǵa jaýapty mınıstrlik retinde jýrnalısterge tartý jasaýdy oılap otyrmyz. Birneshe josparymyz bar. Búgin sonyń alǵashqysy – Mádenıet jáne sport mınıstrliginiń jáne Ulttyq mýzeıdiń qoldaýymen Baspasóz mýzeıin ashýdy jón kórdik. Shyn máninde, ótkensiz bolashaq joq», dedi sala basshysy.
Sondaı-aq ol 2 aqpan – Qazaq baspasózi kúni dep jarııalanatynyn atap ótti.
«2 aqpan – «Qazaq» gazeti dúnıege kelgen kún. Jyl basynda bul kúndi Qazaq baspasózi kúni dep bekitýdi usynǵan edik. Mine, bastamamyz qoldaý taýyp otyr», dedi mınıstr.
Jıynǵa qatysqan Memlekettik syılyqtyń laýreattary Saýytbek Abdrahmanov pen Álibek Asqar jýrnalıstik joldyń qyr-syrymen bólisip, júrekjardy tilekterin arnady.
Aıta keteıik, atalǵan is-sharany Aqparat jáne qoǵamdyq damý mınıstrligi men Mádenıet jáne sport mınıstrligi birlesip uıymdastyryp otyr.
