Zań jobasy Qazaqstanǵa zańsyz jolmen alynǵan múlikti anyqtaý men qaıtarýdyń jáne olardy zańdy ekonomıkalyq aınalymǵa tartýdyń zańnamalyq tetikterin aıqyndaýǵa, múlikti zańsyz ıemdený men alyp qoıýǵa yqpal etken sebepter men jaǵdaılardy joıýǵa, sondaı-aq qoǵamda áleýmettik ádilettilikti qalpyna keltirýge baǵyttalǵan. Buǵan deıin aıtylǵandaı, zań jobasynda aktıvterdi erikti jáne májbúrli qaıtarý qarastyrylǵan.
«Erikti qaıtarý zańsyz alynǵan múliktiń barlyǵyn nemese bir bóligin óz erkimen qaıtarý týraly sharttar jasasý arqyly memleket menshigine berý arqyly júzege asyrylady. Májbúrlep qaıtarý Qazaqstannyń, shet memleketterdiń sot aktileri nemese olardyń quzyretti organdarynyń sheshimderi negizinde júzege asyrylady. Onda qaıtarylǵan aktıvterdi jınaqtaý jáne Qazaqstan halqynyń ál-aýqatyn arttyrýǵa baǵyttalǵan áleýmettik-ekonomıkalyq jobalardy qarjylandyrý úshin arnaıy memlekettik qor men basqarýshy kompanııa qurý qarastyrylǵan», dedi senator Andreı Lýkın.
