Týrnırdiń ashylý saltanatyna Astana qalasy Dene shynyqtyrý jáne sport basqarmasynyń basshysy Samat Jylqybaev, Sport Qory sportty qoldaý qorynyń bas dırektory Ashat Seısembek, Sportshylar odaǵy tóralqasynyń tóraǵasy Serik Sápıev, Azııa boks konfederasııasynyń vıse-prezıdenti Ázız Qojambetov jáne basqa da sport ókilderi qatysyp, boksshylarǵa sáttilik tiledi.
«Qurmetti boksshylar, jattyqtyrýshylar jáne týrnır qonaqtary. Qazaqstan boks federasııasynyń atynan Mádenıet jáne sport mınıstrligi, elorda ákimdigi, Sport Qory jáne t.b. atynan barlyq seriktesimizge alǵys aıtqym keledi. Jaqynda Tashkentte ótken álem chempıonatynda bizdiń jigitter 4 altyn jáne 1 kúmis medal jeńip alyp, búkil Qazaqstandy keremet nátıjemen qýantqanyn bárińiz jaqsy bilesizder. Astana rınginde bizdi qyzyqty ári tartysty jekpe-jekter kútip tur dep oılaımyn. Sportshylarǵa sáttilik pen ádemi jeńister tileımin», dedi Ázız Qojambetov.
Jarystyń alǵashqy eki kúndegi jekpe-jekterine toqtalar bolsaq, birinshi kúngi básekeler tosyn nátıjelerge toly boldy. Jankúıerler «á» degennen birden 71 kılodaǵy eki qazaq-ózbek boksshylarynyń tartysty kezdesýlerin tamashalady. Birinshi jekpe-jekte Nurdan Amangeldi Nýrıslom Ismoılovtan tóreshilerdiń biraýyz sheshimimen basym tússe, ekinshi aıqasta 2021 jylǵy jastar arasyndaǵy álem chempıony Sabyrjan Aqqalyqov Havasbek Asadýllaevtan tóreshilerdiń aralas sheshimimen jeńilip qaldy. Sonymen qatar dál osy salmaqta óner kórsetken Ermahan Jaqpekov pen Talǵat Shaıken jáne 80 kılodaǵy Erasyl Jaqpekov tájikstandyq boksshylardan basym tústi.
Al 63,5 kıloǵa deıingi salmaqtaǵy boksshylardyń jekpe-jekterin «Beeline Arena» sport keshenine jınalǵan kórermender de, bapkerler men boks mamandary da asa yjdaǵatpen tamashalady. Sebebi osy týrnırde jeńimpaz atanǵan boksshy aldaǵy Azııa oıyndarynda 63,5 kıloda el namysyn qorǵaıdy. Sondyqtan elimizdegi eń myqty boksshylardyń bári osy salmaqta toptasyp, ózara kim myqtyny anyqtap jatyr. Máselen, jýyrda ǵana Tashkenttegi álem chempıonatynda 60 kıloda óner kórsetken Talǵat Syrymbetov «Elorda kýboginiń» alǵashqy aınalymynda taǵy bir myqty boksshy Muhamedsabyr Bazarbaıulymen judyryqtasty. Bul jekpe-jek Syrymbetovtiń jaraqatyna baılanysty merziminen buryn aıaqtalyp, jeńis Muhamedsabyrdyń enshisinde ketti. Ekinshi jupta 2021 jyly 60 kıloda el chempıony atanǵan Vasılıı Samchýk tájirıbeli Dilmurat Mıjıtovpen aıqasyp, tóreshilerdiń sheshimimen jeńiske jetti. Sonymen qatar dál osy salmaqtaǵy 2020 jylǵy Qazaqstan chempıony Ertýǵan Zeınýllınov birinshi raýndta qarsylasy Erasyl Tanqaıdy nokaýtqa túsirip, máseleni erte sheship tastady. Sońǵy jupta dańqty Rýslan Mýsınovtiń uly Sultan Mýsınov úndistandyq Ankıt Narvalmen kezdesip, qarsylasynan aılasyn asyrdy.
Halyqaralyq týrnırdiń ekinshi kúninde boksshylar jeti salmaqta judyryqtasyp, boks jankúıerlerine tartysty jekpe-jekter usyndy. Bul jarysta 63,5 kılomen qatar, 57 kılo salmaqta da Azııa oıyndaryna irikteý júrip jatyr. Tashkenttegi álem chempıonatynda 54 kıloda top jarǵan Mahmud Sabyrhan Olımpııa oıyndarynyń baǵdarlamasyna engen 57 kılo salmaqqa kóterilip, jarys kórigin qyzdyrdy. Alǵashqy aınalymda ol el chempıonatynyń jáne halyqaralyq jarystardyń júldegeri Orazbek Asylqulovpen kezdesip, 4:1 esebimen jeńiske jetse, 57 kılonyń kóshbasshysy Serik Temirjanov Nursultan Altynbekti aıqyn basymdyqpen utty. Al 2021 jylǵy jastar arasyndaǵy álem chempıonatynyń kúmis júldegeri Erbolat Sabyr taǵy bir jerlesimiz Asyljan Serikbaıdan basym túsip, kelesi aınalymǵa joldama aldy.
О́zge salmaqtaǵy boksshylardyń nátıjesine toqtalar bolsaq, 51 kılo salmaqta Kenje Muratuly, Damır Ábdiqadyr, 54 kıloda Tımýr Qabdesh, 67 kıloda Temirhan Tezek, Elnur Súıinbaı, Rahat Seıitjan, 80 kıloda Ilıa Kıselev, 86 kıloda Abzal Quttybekov, Bekzat Tańatar, Shaımurat Qusaıynov jáne 92 kılodan joǵary salmaqta Damır Toıbaı alǵashqy aıqastarynda jeńiske jetip, ekinshi kezeńge joldama aldy.
«Elorda kýboginde» erler 13 salmaq dárejesinde (46-48 kg, 51 kg, 54 kg, 57 kg, 60 kg, 63,5 kg, 67 kg, 71 kg, 75 kg, 80 kg, 86 kg, 92 kg, +92 kg), al áıelder 12 salmaq dárejesinde (45-48 kg, 50 kg, 52 kg, 54 kg, 57 kg, 60 kg, 63 kg, 66 kg, 70 kg, 75 kg, 81 kg, +81 kg) judyryqtasyp jatyr.
Jarys jeńimpazdary men júldegerleri tıisti dárejedegi medal, dıplom jáne aqshalaı júldemen marapattalady. Atap aıtqanda, bas júlde ıelengen boksshyǵa – 700, kúmis júldegerge – 400 jáne qola medal ıegerine 200 (árqaısysyna) AQSh dollary beriledi.
