Osy oblystyń Shalqar, Yrǵyz aýdandarynan shóp tasyǵandar da boldy. Sol jyly qysqa túsetin malǵa 770 myń tonna shóp, 8 myń tonna súrlem jáne 213 myń tonna quramajem qajet ekendigi anyqtalyp, biraz bóligi oblystyń ózge aýdandarynan ázirlendi. Aımaqta mal azyǵyn daıyndaý úshin 114 brıgada qurylyp, 1000-nan astam adam jáne 170-ten astam tehnıka jumyldyryldy.
Qurǵaqshylyq zardabyn tómendetý úshin tótenshe jaǵdaı jarııalanyp, oblystyń rezerv qorynan 250 mln teńge bólindi. Úkimet rezervinen taýar óndirýshilerdiń jemshóp satyp alý shyǵyndaryn ishinara sýbsıdııalaýǵa 1,7 mlrd teńge qarjy qaraldy. Jurt qýańshylyq qıyndyǵynan osyndaı qoldaýdyń arqasynda ótti.
Qýańshylyqtan sabaq alǵan sharýalar byltyr malazyqtyq daqyldardy 4,9 myń gektarǵa artyq egip, onyń jalpy kólemi 71,3 myń gektarǵa jetti. Budan bólek, kanal tazalaý, uńǵymalardy qalpyna keltirý jáne burǵylaý, qashyrtqy sýlardy qaıta paıdalaný sekildi tirlikter jemisin berdi. Erte kóktemde kólder júıesin toltyrý arqyly 75,9 myń gektar shabyndyq jer sýlandyryldy. Osydan da 2021 jyly 1200-1500 teńgege jetken jońyshqa baǵasy byltyr 700-750 teńgege tústi.
Oblystyq aýyl sharýashylyǵy jáne jer qatynastary basqarmasy mamandarynyń aıtýynsha, bıylǵy mal azyǵyn daıyndaý naýqanynyń málimetteri shilde aıynyń ortasynan aýa naqtylana bastaıdy. Al aýdan ákimdikterine habarlasqanda bilgenimiz Jańaqorǵan aýdanynda bıyl qysqa túsetin mal basy naqtylanyp 183 myń tonna shóp, 36 myń tonna jem, 37 myń tonna saban daıyndaý jospary bekitilgen. Qazir sharýashylyqtarda jońyshqanyń birinshi orymy bitip, 40 myń tonna shóp daıyndalypty. Bir býmasy 500-600 teńgeden satylyp jatyr. Jalpy, oblystaǵy jońyshqalyq alqaptyń kóp bóligi osy aýdannyń aýmaǵynda.
Jańaqorǵandaǵy «Agrotehnologııa» ǵylymı-óndiristik sharýa qojalyǵy 78 gektar aýmaqqa jońyshqa egedi. Sharýashylyq tóraǵasy Kerimhan Egizbaevtyń aıtýynsha, bıyl kóktemde darııada sý jetkilikti bolǵanmen alqaptarǵa kesh berilipti.
– Qazirgi shóp shyǵymy jaman emes. Biraq sý ýaqytynda berilse, budan da joǵary alýǵa bolar edi. Oblystaǵy ýaq maldyń da, sıyrdyń da kóbi osy bizdiń aýdanda. Aýdan sharýashylyqtary aýyspaly egis talabyn barynsha saqtap otyr. Bul – mal azyǵyn ózimiz daıyndaýdyń basty múmkindigi. Biraq bizdi alańdatatyny aýdan aýmaǵyndaǵy darııa arnasynda tospanyń joqtyǵy. Úrlemeli tospa jaramsyz bolyp qalǵaly da biraz jyldyń júzi aýdy. Eger darııa arnasyndaǵy sý kólemi sekýndyna 250 tekshe metrge túsip ketse, Kelintóbe magıstraldy kanaly qańsyp qalady. Bul – búkil aýdan aıaq sýdan qalady degen sóz. Osy másele sheshimin tapsa, sharýanyń kóńili jaılanar edi, – deıdi sharýashylyq tóraǵasy.
Aral aýdanyndaǵy tórt túlik sany qazir 254 560 basqa jetti. Byltyr aýdan boıynsha 180 591 tonna mal azyǵy daıyndalǵan, qazir sonyń 59 672 tonnasy qalyp tur. Aldaǵy qysqa 181 000 tonna jemshóp qajet. Qazir sharýalar osynyń qamynda júr.
Osy naýqanda Jalaǵash aýdanyndaǵy 58,9 myń bas malǵa 84 myń tonna shóp, 29, 3 myń tonna saban jáne 19 myń tonna jem daıyndalýy kerek. Aýdanda aýyspaly egis talabyna sáıkes 12050 gektarǵa jońyshqa egilgen. Syrdarııa aýdany da jońyshqanyń alǵashqy orymyn aıaqtap qaldy.
Jalpy, qaı aýdanda da qysta qınalyp qalmaýdyń qareketi jasalyp jatyr.
Qyzylorda
