Palata spıkeri Senat pen máslıhattardyń birlesken jumysynyń basty mindeti el Prezıdentiniń bastamasymen qolǵa alynǵan reformalardyń iske asyrylýyn zańnamalyq deńgeıde sapaly qamtamasyz etý ekenin atap ótti.
Máýlen Áshimbaev jergilikti ókildi organdardy osy baǵytta belsendi jumys isteýge shaqyryp, óńirdegi mańyzdy máselelerge nazar aýdardy.
«Senat pen máslıhattardyń birlesken jumysyndaǵy mańyzdy baǵyttardyń biri – óńirlerdegi ózekti máselelerdi sheshý. Mundaı máseleler az emes. Olardyń basym bóligi ınfraqurylymǵa, áleýmettik nysandarǵa, memlekettik baǵdarlamalardyń oryndalýyna qatysty ekeni belgili. Ulytaý oblysynda osyndaı máselelerdi sheshý úshin óńirdiń 2026 jylǵa deıingi áleýmettik-ekonomıkalyq damýyn qamtamasyz etetin keshendi jospar qabyldanǵanyn bilemiz. Elimizdiń damýyn jáne azamattardyń ómir súrý sapasyn arttyrýdy qamtamasyz etý – bizdiń ortaq maqsatymyz. Sondyqtan Senat óńirlerdiń múddesin qorǵaıtyn Palata retinde máslıhattarmen ózara baılanysty odan ári nyǵaıta beredi», dedi M.Áshimbaev.
Sondaı-aq Senat tóraǵasy senatorlar men máslıhat depýtattarynyń birlesken jumysynyń negizgi baǵyttaryna toqtalyp ótti. Bul rette zańnamalyq jumysqa máslıhat depýtattaryn tartýdyń mańyzdy ekeni aıtyldy. Senatorlar óńirlerdi damytý máselesin árdaıym nazarda ustap, máselelerdi júıeli sheshýge zańnamalyq turǵydan yqpal etetin bolady. Atalǵan baǵytta «О́ńir» depýtattyq toby jáne alǵashqy otyrysy mamyr aıynda bolǵan Jergilikti ókildi organdarmen ózara is-qımyl jasaý jónindegi keńes jumys isteıtinin atap ótken jón.
Kezdesý barysynda basqarý júıesin ortalyqsyzdandyrý máselesine de basa mán berildi. Bul jóninde Memleket basshysy birneshe ret aıtqany belgili. Mundaı ákimshilik transformasııa máslıhattardyń quzyretin keńeıtedi jáne rólin arttyrady, sondaı-aq óńirdiń damýy úshin jańa múmkindikterge jol ashady.
Jıynǵa qatysýshylar depýtattar arasynda tájirıbe almasýdyń jáne oqytý trenıngteri men semınarlar uıymdastyrýdyń mańyzy zor ekenine de nazar aýdardy. Mundaı ózara is-qımyl jergilikti ókildi organ qyzmetkerleriniń biliktiligin arttyra túspek.
Ulytaý oblystyq máslıhatynyń depýtaty N.Raskopopov oblys turǵyndaryn mazalap júrgen sapaly aýyz sý máselesi týraly sóz etti. «Jezqazǵan halqy aýyz sýdyń 70 paıyzyn ashyq sý qoımasynan alady. Sondyqtan da halyq «Úıtas-Aıdos» sý qubyrynyń tezirek paıdalanýǵa berilýin taǵatsyzdana kútip otyr. Qazir munda merdiger jaqsy jumys júrgizip jatyr, qarjylandyrý máselesinde úzilis bolyp qalmaýy óte mańyzdy», dedi ol.
Depýtat Q.Rysbekov memlekettik satyp alý týraly zańdy qaıta qaraý týraly usynys bildirdi. О́ıtkeni bar sharýany tenderge tirep qoıýdyń teristigin ýaqyt kórsetip otyr. «Tenderge tipti eshqandaı qural-jabdyǵy joq kompanııalar da qatysyp, jeńimpaz atanyp jatady. Sonyń saldarynan jumys júrmeıdi, ýaqyt zaıa ketedi», deıdi depýtat. Kezdesý barysynda Senat tóraǵasy árbir pikir men usynystyń eskerýsiz qalmaıtynyna sendirdi.
Oblysqa sapary kezinde Senat tóraǵasy Ulytaýǵa arnaıy baryp, jergilikti aqsaqaldarmen kezdesti. О́z sózinde Máýlen Áshimbaev óńirdegi tarıhı-mádenı eskertkishterdi saqtaýǵa úlken úles qosyp kele jatqan aǵa býynǵa alǵys bildirdi. Ol oblystyń bul baǵyttaǵy áleýetin odan ári arttyrý jolynda el aǵalarynyń aldaǵy ýaqytta da belsendilik tanytatynyna senim bildirdi.
«Ulytaý – ultymyzdyń uıasy. Bizdiń memlekettiligimiz osy kıeli jerden bastaý alady. Memleket basshysy Qasym-Jomart Kemeluly Toqaevtyń Ulytaý oblysyn qurý týraly sheshimi óńirdiń damýyna tyń serpin berdi. Bul ólkede kóptegen tarıhı-mádenı eskertkish, tarıhymyzdaǵy uly tulǵalardyń keseneleri bar ekeni belgili. Olardy laıyqty qorǵaý jáne saqtaý – ortaq jaýapkershilik. Osy baǵyttarda júıeli jumys atqarý – ultymyzdyń múddesin qorǵaý, joǵyn túgendeý, tarıhı tulǵalarymyz ben mádenı muralarymyzdy ulyqtaý bolary anyq», dedi M.Áshimbaev.
Sonymen qatar Senat spıkeri Palatanyń osy baǵyttaǵy jumysyna toqtalyp, «Ulttyq múdde» alańynyń mańyzy jóninde aıtty. Odan bólek, ulttyq qundylyqtar taqyrybyna arnalǵan Úkimet saǵaty men Parlamenttik tyńdaýlardyń nátıjesi jaıynda sóz qozǵady.
О́skeleń urpaqtyń boıyna ulttyq qundylyqtardy sińirýdiń bereri qashanda mol ekeni sózsiz. Máýlen Áshimbaev oblystyń belsendi jastarymen kezdesýde osy máselege kóńil bóldi. О́z sózinde Senat Tóraǵasy talantty, bilimdi jas býyn elimizdegi ózgeristerdiń jáne Ádiletti Qazaqstan qurýdyń negizgi qozǵaýshy kúshi ekenin tilge tıek etti.
«Sizderdiń árqaısyńyz eńbekqorlyq pen tabandylyqtyń arqasynda óz salalaryńyzda aıtarlyqtaı nátıjege qol jetkizdińizder. Memleket maqsaty aıqyn, patrıot jastarǵa qoldaý kórsetýdi jáne olardyń ári qaraı damýyna jaǵdaı jasaýdy jalǵastyra beredi. Sizderdiń kreatıvti ıdeıalaryńyz ben usynystaryńyz elimizdiń bolashaǵyna áser etetini sózsiz. Osy jaýapkershilikti árqaısyńyz sezinip, memleketimizdiń damýyna úlken úlesterińizdi qosasyzdar dep senemin», degen Máýlen Áshimbaev kezdesýge qatysýshylardyń nazaryn Abaıdyń «Tolyq adam» men Qasym-Jomart Toqaevtyń «Adal azamat» tujyrymdamalaryn tıimdi rýhanı baǵdar retinde ilgeriletýdiń mańyzdylyǵyna aýdardy.
Sonymen qatar Senat tóraǵasy jastarǵa Palatanyń zań shyǵarý qyzmeti, jas býyndy memlekettik basqarý salasyna jumyldyrý jáne azamattyq áleýetti jandandyrý jónindegi jumystary týraly aıtyp berdi. О́z kezeginde Ulytaý jastary Senat janyndaǵy Jas sarapshylar klýbynyń jáne Taldaý mektebiniń qyzmetine qyzyǵýshylyq bildirdi.
Odan bólek, óńirge sapary aıasynda Máýlen Áshimbaev Abaı atyndaǵy daryndy balalarǵa arnalǵan mamandandyrylǵan mektep-ınternatynyń jáne «Ulytaý tehnologııalyq ýnıversıtetiniń» ujymymen kezdesti. Sondaı-aq ol «Ulytaý» vızıt-ortalyǵynyń qyzmetimen tanysyp, «Joshy han», «Dombaýyl», «Alashahan» jáne «Altyn shoqy» tarıhı-mádenı keshenderi men kesenelerin zııarat etti.
