Erler arasyndaǵy elimizdiń birinshi raketkasy «Úlken dýlyǵa» sanatyndaǵy týrnırdiń alǵashqy aınalymynda dúnıejúzilik reıtıngte 54-orynda turǵan amerıkalyq Makkenzı Makdonaldpen baq synasty. Birinshi partııa á degennen taı-breıkke deıin jalǵasyp, 13 geımde amerıkalyq sportshynyń baǵy jandy – 7:6 (7:3). Ekinshi partııanyń segizinshi geıminen keıin tarazy basy 4:4 esebimen teńesip turǵan mezette Býblık breık jasap, sosyn óz geımine upaı alyp, bul setti jeńispen túıindedi – 6:4.
Úshinshi set bastalǵan sátte jerlesimiz dopty oıynǵa qosqanda qatelikke boı aldyryp, qarsylasynyń breık jasaýyna jol berip qoıdy – 0:2. Degenmen, keıinnen tarazy basyn teńestire aldy – 4:4. Sodan keıin taǵy bir breıkke qol jetkizip, úshinshi partııany da óz paıdasyna aıaqtady – 6:4. Tórtinshi partııada otandasymyz óte senimdi oıyn kórsetip, 6:4 esebimen matchty aıaqtady. Endi Aleksandr ekinshi aınalymda taǵy bir amerıkalyq tennısshi, álemniń 48-raketkasy Djeffrı Djon Volfpen kortqa shyǵady. Al keshe keshkisin álemniń úshinshi raketkasy Elena Rybakına men elimizdiń ekinshi raketkasy Iýlııa Pýtınseva Ýımbldondaǵy alǵashqy oıynyn ótkizdi.
