Jergilikti sharýalar óńirde jaǵdaıdyń áli de ýshyǵyp turǵanyn aıtady. Qaptaǵan zııankestiń beti qaıtar emes. Qazir Jangeldın, Amangeldi jáne Naýyrzym aýdandaryndaǵy shegirtke basyp qalǵan egistikterde 31 arnaıy tehnıka hımııalyq óńdeý júrgizip jatyr. Olardyń ishinde 9 jerústi jeldetkish búrikkish, 13 aerozoldi gaz generatory, 6 jeńil avıasııa kemesi jáne 3 ushaq bar. Alqapty ýlaý jumystarynyń basy-qasynda óńirge arnaıy jumys saparymen kelgen Aýyl sharýashylyǵy mınıstrligine qarasty Memlekettik ınspeksııa komıteti tóraǵasynyń mindetin atqarýshy Qanysh Álıev júr.
Oblystyq aýmaqtyq ınspeksııasy memlekettik ınspeksııa bóliminiń basshysy Tilek Tólebaevtyń aıtýynsha, bıyl oblysta úıirli zııankesterge qarsy hımııalyq óńdeýden ótýi tıis 422,904 myń gektar alqap belgilenip, oǵan jetetin preparattyń bári ákelingen. Hımııalyq óńdeý jumystaryn iske asyratyn qyzmet kórsetýshi mekemeler de anyqtalǵan. Shildeniń ekisine deıin óńirde 257,2 myń gektar jerge ıtalııalyq prýsqa qarsy ý shashý josparlanǵan. Búginge deıin sonyń 66 paıyzdan astamy hımııalyq óńdeýden ótipti. Búginge deıin Amangeldi, Altynsarın, Denısov, Fedorov, Sarykól, Qamysty aýdandaryndaǵy úıirli shegirtke kóbeıýi múmkin alqaptarǵa hımııalyq óńdeý jumystary júrgizilgen.
Jangeldın aýdanynyń sharýalary úıirli shegirtke 10 myń gektardan asa egistigimizdi typ-tıpyl etip ketti deıdi. Alaıda alqaptardy hımııalyq óńdeýge jaýapty resmı oryndar «zııan shekken aýylsharýashylyq daqyldaryn baıqamadyq» dep otyr. Al áleýmettik jeli arqyly tarap jatqan fotosýretterden endi ǵana boılap kele jatqan bıdaı sabaǵynyń julma-julmasy shyqqany anyq baıqalady.
– Alqaptardy hımııalyq óńdeýden ótkizý jumystary 21 mamyrda bastaldy. Úıirli shegirtke buǵan deıin úsh ret anyqtalyp, olardy joıýǵa arnaıy tehnıka jiberildi. Qazir buǵan deıin hımııalyq óńdeýden ótken jerlerdiń ózinen úıirli shegirtke shyǵyp jatyr. Italııa prýsy degen óte ómirsheń zııankestiń qataryna jatady. Qazir shegirtke basqan alqaptardy ýlaý jumystary komıtet tóraǵasynyń mindetin atqarýshy Qanysh Álıev pen oblystyq aýmaqtyq ınspeksııa basshylarynyń baqylaýymen iske asyrylyp jatyr. Sharýalarǵa qanshalyqty shyǵyn kelgenin, neshe gektar alqap zııan shekkenin dál qazir sol aýdandarda jumys istep jatqan jumys toby anyqtaıtyn bolady, – dedi T.Tólebaev.
Shegirtkeden kelgen shyǵynnyń bar-joǵyn Jangeldın aýdandyq aýyl sharýashylyǵy bóliminiń mamandary da aıta almady. «Dál qazir shyǵyn týraly naqty málimet bere almaımyz. О́ıtkeni shegirtke áli bar. Dándi alqaptarǵa kelgen zalal mólsheri zııankesterdi joıyp bolǵan soń baryp esepteledi», deıdi mamandar. Eginimdi shegirtke jep qoıdy dep shyryldap júrgen sharýalarǵa qandaı kómek kórsetiletini de, ázirge belgisiz.
Qostanaı oblysy
