«Tumardyń» jeńimpazdary

«Túrli merekelik is-shara uıym­das­tyrylyp, alýan marapat tapsyryldy. Ulttyq baspasózdiń qaınar bu­laǵy, bastaý kózi «Qazaq» gazetiniń alǵashqy nómiri jaryqqa shyqqan 2 aqpan – «Ulttyq baspasóz kúni» bolyp bekitildi. Búgin elordamyzda keremet Jýrnalıster saıabaǵy ashyldy. Mine, búgin jýrnalıster dekadasyn «Tumar» ulttyq syılyǵymen qorytyndylaǵaly otyrmyz.

Osy is-sharalarǵa úlken qoldaý kórsetken Astana qalasy ákimdigine rahmet aıta otyryp, búgingi «Tumar» syılyǵyn Astananyń 25 jyldyǵyna arnaǵanymyzdy atap ótken jón. О́zderińizge málim, bıyl serıaldarǵa bólek syılyq jarııalap, ony naýryz aıynda tabystadyq. Sondyqtan «Tumar» syılyǵyna anımasııa, sport jýrnalıstıkasy enip otyr», dedi D.Qydyráli.

«Tumar» ulttyq syılyǵy baı­qaý­dyń 12 atalymy boıynsha sarapqa sa­lyndy. Baıqaýǵa bıyl de­rekti fılm, anımasııa, sport jýrnalıstıkasy qatarly jańa atalymdar qosyldy. Belgili qalamger-jýr­nalıst Kamal Smaıylov, ult­tyq anı­masııa óneriniń atasy Ámen Qaı­da­r, sport kommentatory Amangeldi Seıt­han atyndaǵy syılyqtar taǵaıyndaldy.

«Osy oraıly sátti paıdalanyp, barsha áriptesime shyn júrekten rıza­shy­lyǵymdy bildiremin. Bıyl­dyń ózinde álemde, elimizde kóptegen rezonansty oqıǵa boldy. Elimizde tórt úlken saılaý ótti. Tó­tenshe jaǵdaılarmen betpe-bet keldik. Osynyń bárinde jýrnalıster qaýymy jarǵaq qulaǵy jastyqqa tımeı óz mindetterin atqardy.

Aqparat salasynyń aqıqat aıdy­ny ekenin kórsetip júrgen árip­testerimiz túrli debattar uıym­das­tyrdy. Jedel aqparat jetkizdi. So­nymen qatar tikeleı efırden bas­qa da saraptamalyq materıaldar uıymdastyrdy. Sizderge osy oraıly mezette taǵy da rızashylyǵymdy bil­­dirgim keledi. Sonymen qatar «Tumar» ulttyq syılyǵy jýr­na­lıs­ter arasynda úl­ken qyzy­ǵý­­­shylyqqa ıe. Bıylǵy baı­qaýǵa kelip túsken ótinimder so­nyń aıǵaǵy», dep sózin qorytyndylady sala basshysy.

Baıqaýdyń «Úzdik derekti fılm» júldesine «Abaıdyń sońǵy kún­deri» derekti fılmi laıyq dep tanyldy. Fılm jáne ssenarıı avtorlary – jazýshy-jýrnalıst Qanat Tileýhan men ádebıetshi-ǵalym, pýb­lısıst Baǵashar Tursyn­baıuly. Uly oıshyldyń aqyrǵy kúnderi týraly tarıhı fılm «Habar» agenttiginiń tapsyrysy­men túsirilip, qazan aıyn­da kórer­men nazaryna usynyldy.

Budan keıin qoǵam jáne memleket qaıratkeri Qýanysh Sul­ta­nov «Úzdik áleýmettik joba» ata­lymynyń syı­lyǵyn tabystady. Onyń aıtýynsha, baıqaýǵa usy­ny­lyp, iriktelgen ju­mystyń qaı-qaısysy da marapatqa laıyq.

«Tańdaý óte qıyn boldy. Sol tań­daýlynyń tańdaýlysy ishinen shyǵa­tyn úzdikter bar. «Otandy súıý ot­basynan bastalady». Adamǵa jan­ashyrlyq sezim – qoǵamǵa, elge, jurt­qa, sonyń jaqsylyǵyna, beıim­­de­­lýine, júrek tazalyǵy men jan, tán tazalyǵymen keletin asyl qa­sıet. Osy janashyr degen bir ǵana sóz­ben aı­tylady. Osy sátti paı­da­­lanyp, «Úz­dik áleýmettik joba»­ ata­lymynyń je­ńimpazy «Jan­­ashyr» («Jetisý» telearnasy)­ baǵ­­darlamasyna buıyrdy», dedi Q.Sultanov.

«Úzdik analıtıkalyq baǵdarla­ma» atalymyn qoǵam jáne memleket qaıratkeri Saýytbek Abdrah­ma­­nov tapsyrdy. Qarymdy qalam­ger salmaqty oıly kórermen sarap­ta­malyq baǵdarlamalardy kóretinin atap ótti.

«Oqıǵaǵa, qoǵamǵa baǵa berý, taldaý jasaý – óte qıyn. Ári oı tereńdigin ári kásibı sheberlikti talap etedi. Sondyqtan osy atalymdy tapsyrý buıyrǵanyna qýanyp otyrmyn. Osy arqyly búgingi «Tu­mardyń» minberin paıdalanyp, televızııaǵa baılanysty bir oıym­dy aıtpaqpyn. Búkil abyroı túptep kelgende telejýrnalısterge tıedi. Mınıstr Darhan Qýandyquly jaqsy jańa­lyqty jetkizdi. Astanada Jýr­na­lıster saıabaǵy ashyldy. Ol saıabaq «Egemen Qazaqstan» kóshesinde ashyldy.  «Egemen Qazaqstan» gazetiniń redaksııasy aldyn­da ashyl­dy. Endi, sol jerde eskertkish kimge qoıyldy dep oılaısyzdar? Eskert­kish telejýrnalıske qoıyldy. Saıa­baqta mıkrofon ustaǵan qyz ben kamera ustaǵan jigittiń ádemi mú­sini tur. Bul da telejýrnalısterge kórsetilgen qurmettiń belgisi», dedi S.Abdrahmanov.

Osylaısha, «Qazaqstan» tele­arnasy­nyń «Apta» aqparattyq-sarap­ta­ma­lyq baǵdarlamasy «Úzdik analı­tıkalyq baǵdarlama» atalymy bo­ıynsha «Tumar» ulttyq syılyǵyn ıe­lendi. «Apta» baǵdar­lamasy ár jek­senbi 20:00-de tike­leı­ efırge shy­ǵady. Baǵdarlama júr­­gi­zýshisi – Albına Áshim.

Sondaı-aq baıqaýda «Úzdik tok-shoý» atalymynyń jeńimpazdary anyqtaldy. Ony Senat depýtaty Bı­bigúl Jeksenbaı tabystady.

«Búgin – jyl saıyn asyǵa kútet­in dúbirli toı. Bárińizdi osy toıda kórgenime asa qýanyshtymyn. Eń birinshi, barshańyzdy elor­da­myzdyń 25 jyldyǵymen qut­tyqtaımyn. Shyny kerek, osy zalda otyrǵandardyń kóbi 25 jyl buryn munda bolmaǵan da shyǵar. Árqaısymyz bir shabadanymyzdy qushaqtap, Astanaǵa kelgenimiz esimizde. Jýrnalısterdiń elorda damýyna qosqan úlesi zor. Árqaı­symyzdyń jasaǵan repor­tajymyz arqyly elimizdiń túkpir-túkpirindegi baýyrlarymyz, aǵaıyn­­darymyz Astanaǵa asyqqany ras. Endeshe, bul toı – bárimizge ortaq toı», dedi B.Jeksenbaı.

«Úzdik tok-shoý» atalymy­ «Qazaqstan» telearnasynyń «1001 tún»­ jobasyna tapsyryldy. Baǵ­dar­la­­mada qoǵamda rezonans týdyrǵan oqı­ǵa­lar talqylanyp, kúnniń eń ózekti oqıǵasy boıynsha aqparattardyń anyq-qanyǵy kýágerler, resmı ókilder men arnaıy mamandar arqyly jetkiziledi. Sonymen qatar stýdııada túrli sala boıynsha tulǵalarmen erkin suhbat júrgiziledi. Baǵdarlama júrgizýshileri – Ǵalymjan Keń­shi­lik­ pen Áıgerim Seıfolla. Habar dúı­senbi-beısenbi kúnderi 23:25-te tikeleı efırge shyǵady.

«Balapan» telearnasynyń «Dári­ger Dana» mýlthıkaıasy «Úzdik anımasııalyq fılm» atandy. Joba «Tumar» ulttyq televızııalyq báıgesiniń Ámen Qaıdar atyndaǵy arnaıy júldesin ıelendi. «Úzdik anımasııalyq fılm» atalymynyń nomınant­tary qataryna «Qazaqstan» teleradıokorporasııasynyń tórt birdeı jobasy endi. Úmitkerler qatarynda «Dáriger Dana» mýlt­hı­kaıasynan ózge, «Balapan» arna­synyń tapsyrysymen tú­si­­­ril­gen «Toqty men serke», «Oıyn­­shyqtar» jáne «Jambyl» tele­arnasynyń «Eshkim de, eshteńe de umytylmaıdy» anımasııalyq týyn­dy­lary boldy.

Jýrnalıst, kommentator Eseı Jeńisuly «Úzdik sport kommentatory» atalymy boıynsha «Tumar» ult­tyq syılyǵynyń Amangeldi Seıithan atyn­daǵy arnaıy júldesin jeńip aldy.

«Tumar» ulttyq televızııalyq baıqaýynda jýrnalıster bıyl alǵash ret «Úzdik sport kommentatory» jáne «Úzdik jýrnalıstik zertteý» atalymdary boıynsha baq synady. Eseı Jeńisulynan bólek, «Qazsport» telearnasynyń kommentatorlary Ermuhamed Máýlen men Dinmuhamed Tó­legenov baıqaýdyń short-lıstine endi.

Budan bólek, «Úzdik aqparattyq baǵdarlama» atalymy «Atameken Business» telearnasynyń «Dnevnoı format» baǵdarlamasyna, «Úzdik jýrnalıstik zertteý» atalymy «Habar 24» telearnasy «Arnaıy reportaj» baǵdarlamasyna buıyrdy.

«Jibek Joly» telearnasynyń «Tún­gi stýdııa» tokshoýy «Úzdik oıyn-saýyq baǵdarlamasy», «Caspian News» (Atyraý qalasy) «Úzdik aı­maqtyq telearna» atandy. Birinshi arna «Evrazııa» arnasynyń tilshisi Áıgerim Muzdybaeva «Úzdik telejýrnalıst» atalymynda jeńiske jetti. «Úzdik telejúrgizýshi» atalymy Svetlana Býlatova («KTK» telearnasy) men Erkin Baıǵabylulyna («Habar 24» telearnasy) buıyrdy. Arnaıy júlde «31 arna» telearnasyna otandyq televızııalyq salanyń damýyna qosqan úlesi úshin tabystaldy.

Bıyl baıqaýǵa 12 atalym bo­ıynsha 300-ge­­ jýyq ótinim kelip túsken. Short-lıstke 48 ju­mys endi. Jeńimpazdar qazylar alqasy­nyń jabyq daýys berýi arqyly anyqtaldy.

Jeńimpazdar televızııa sala­syn­daǵy eń joǵary jetistikteri úshin «Tumar» músinshesiniń jáne 1 mıllıon teńge kólemindegi qarjylaı syıaqynyń ıegeri atandy. Is-sharaǵa «Qazaqstan RTRK» AQ men «Habar» agenttigi demeýshilik jasady.