«Naz» memlekettik bı teatrynyń qalyptasýy bas qalamen tikeleı baılanysty. Sebebi teatr elorda Arqa tósine kóshkennen keıin quryldy. Sodan beri óner ordasy Astanamen birge damyp, rýhanı kemeldenip keledi.Osy jyldar ishinde óner ujymy elimiz ben bas shahardyń mereıin shet memleketterde talaı márte asyrdy.Teatr repertýaryndaǵy qaıtalanbas qoıylymdar men konserttik baǵdarlamalar arqyly sheteldik kórermenderge qazaq bı óneriniń ereksheligin tanytty.
Elorda merekesine arnalǵan konsertte óner ujymy qazaqtyń salt-dástúrin pash etetin «Tusaýkeser», «Súıinshi», «Sekirtpe», «Qaıym aıtys», «Kóńilashar» sekildi erekshe qoıylymdardy tartý etti. Sonymen birge qazaq jigitteriniń batyrlyǵyn, órligin, qaısarlyǵyn beıneleıtin «Taý uly» týyndysy teatrdyń betke ustar qoıylymy ekenine kózimiz jetti. Al qazaq qyzynyń náziktigin, sulýlyǵyn aıshyqtaǵan «Nazbıke», «Ińkár sezim», «Aqqý», «Serpin» bıleri kórermendi birden baýrady. Sondaı-aq konsertte teatr ánshileri, halyqaralyq jáne respýblıkalyq baıqaýlardyń laýreattary Bátıma Izenaeva, Zaǵıpa Imanǵazıeva, Aısultan Basyqara áýeletip án salyp, tyńdaýshylardyń yqylasyna bólendi.
Bir sózben aıtqanda, Astanamen birge kórkeıip, arnasy keńeıgen «Naz» memlekettik bı teatrynyń halqymyzdyń kóne dáýirden búginge jetken ulttyq qundylyqtaryn horeografııa tilinde jetkizgen erekshe formadaǵy qoıylymy kóńilimizden shyqty.
