QR-kodtyń lańy

Qala kóshelerindegi eskert­kish­ter men tarıhı nysandar jaıly keńirek aqparat alý, týrıs­terge qolaıly jaǵdaı týdyrý maqsatyn kózdegen QR-kodtar bastamasy 2018 jyly qolǵa alynyp, oǵan 1,7 mln teńge bıýdjet qarajaty jumsalypty. Álgi QR-kodqa uıaly telefonyńyzdyń kamerasyn jaqyndatsańyz bolǵany, tarıhı eskertkish, belgili tulǵalar jaıly aqparat resýrsy ınternetten avtomatty túrde ashylady. Sol ýaqytta bul da sıfrlandyrýdyń ıgiligi ǵoı dep qýanǵanymyz ras. Alaıda sıfrly tehnologııany únemi baqylaýda ustamasań, qoǵamǵa kesirin tıgizip, lań salatyn qyrsyzdyǵy da bar eken. Bıyl maýsym aıynyń ortasynan jergilikti turǵyndar men syrttan kelgen meımandar bul sıfr­ly siltemelerdiń durys jumys istemeı turǵanyn, telefonmen skanerlegende esirtki satatyn ınternet dúkenderdiń jarnamasy shyǵa keletinin baı­qa­ǵan. Qala kóshelerinde turǵan 280 taqtaıshanyń kóbinen osyn­daı kúmándi aqparattar tabyl­ǵan. Jurtshylyq negizinen Asta­na, Qamzın kóshelerinde keleń­siz­dik­ter­ge tap bolǵanyn aıtady.

О́ńirlik mádenıet, tilderdi damytý jáne arhıv isi basqarmasynan habarlanǵandaı, bıyl 1 qańtarda atalǵan QR-kodtar tıisinshe jumys istep, durys aqparattardy kór­se­tip turǵan. Qazirgi kúni barlyq resýrs­tyq taqtaıshalar alynyp, olardy jańa­rtý kózdelip otyr. Shahardaǵy eskert­kishter men ǵımarattardyń tizimi túzilip, olar jaıyndaǵy aqpa­rat­tardyń qory Pavlodar oblys­tyq Potanın atyndaǵy tarı­hı­-ólketaný mýzeıiniń saıtyna to­ǵys­tyrylyp jatyr. Endigi jerde QR-kodtardyń siltemesi birden sol saıt­qa baǵyttamaq.

Anyqtap bilgenimizdeı, qala­nyń­ kórnekti jerlerine álgindeı QR-kodtardy 2018 jyly «Tolchın A.S.»­ jeke kásipkerligi ilgen. 2018 jyl­­dyń mamyr aıynda atalǵan sýbek­timen Potanın atyndaǵy tarıhı-ólketaný mýzeıi shartqa oty­­rypty. Kásipkerlik buǵan qosa sha­har­daǵy kórnekti jerlerdiń kar­­tasyna, áleýmettik jelidegi aqpa­­rattyq materıaldardy ázirleý jáne ornalastyrý qyzmetine de jaýap­ty bolǵan.

Qazirgi kúni atalǵan oqıǵa bo­ıyn­sha óńirde qylmystyq tergeý bastaldy. «О́ńirlik polısııa­ depar­­tamentiniń polıseıleri Qyl­­­­­mystyq kodekstiń 299-baby, 1-tarmaǵy boıynsha sotqa deıin­gi­ tergeý-tekserý sharalary júr­gi­zi­lip­ jatyr. Onyń aıasynda jedel izdes­tirý sharalary qolǵa alynyp, qyl­mystyq oqıǵaǵa qatysy bar tul­ǵa­lar anyqtalýda» delingen polı­sııanyń resmı aqparatynda. Tek­serý nátıjeli bolsa, kináli aza­mattar úsh jylǵa deıin bas bostandyǵynan aıyrylyp, dúnıe-múlki tárkilenýi múmkin.

Pavlodar oblysy