Avıakompanııa basshylyǵy usynǵan aqparatqa sáıkes, Boeing-737 ushaǵy aptasyna 2 ret, sársenbi jáne senbi kúni qatynaıdy. Ushý ýaqyty - 2,5 saǵat.
«Bul bastama eki el arasyndaǵy áýe qatynasyn nyǵaıtyp qana qoımaı, saýda-ekonomıkalyq, ınvestısııalyq, týrıstik jáne mádenı yntymaqtastyqty damytýdy jedeldetedi», delingen Almaty halyqaralyq áýejaıy taratqan aqparatta.
Aıta keteıik, jańa reıstiń ashylatyny týraly Memleket basshysy Qasym-Jomart Toqaev pen Pákistan Premer-mınıstri Shahbaz Sharıftiń telefon arqyly yntymaqtastyq máselesin talqylaýynan keıin belgili boldy. Keıin elimizdiń Indýstrııa jáne ınfraqurylymdyq damý mınıstrliginiń Azamattyq avıasııa komıteti Pákistannyń avıasııalyq bılik organdarymen birlesip, turaqty jolaýshylar reısin ashý máselesin qolǵa alǵan edi.
«Qazaqstan men Pákistan arasyndaǵy qarym-qatynas jyl saıyn nyǵaıyp keledi. Qazir álem elderi týrızm, saýda sekildi mańyzdy salalarda yntymaqtasýdy kózdeıdi. Al jańa reıstiń ashylýy – eki el arasyndaǵy osy baǵyttardy nyǵaıtady. Bizdiń dinimiz bir, mádenıetimiz uqsas. Sondyqtan jańa bastama qos tarap úshin de tıimdi bolady dep senemin», dedi Qazaqstandaǵy Pákistan ıslam respýblıkasy elshiliginiń Saýda jáne ınvestısııa máseleleri jónindegi keńesshisi Farýh Mýhammad.
