«Barshaǵa belgili, áleýmettik jeliler búginde negizgi aqparat kózi men qoǵamdyq-saıası baǵytty qalyptastyratyn platformaǵa aınaldy. «Qoǵam tynysynyń barometri» atanǵan mass-medıa salasy qarqyndy damyǵan tusta aqparattyq tehnologııalar áserimen álem kúrt ózgeriske ushyrady, kommýnıkasııanyń landshafty da tereń transformasııaǵa tústi. Máselen, kúni keshe ǵana Reuters Institute jarııalaǵan bıylǵy «Dıjıtal jańalyqtar esebi» boıynsha, álemde áleýmettik jeli arqyly jańalyqpen tanysý 30 paıyzǵa ulǵaıǵan. Osyǵan baılanysty Prezıdent 2022 jylǵy 16 naýryzdaǵy Joldaýynda medıa salanyń damý úrdisin eskere otyryp, BAQ týraly zańdy qaıta qaraýdy tapsyrǵany belgili.
Bul oraıda medıa qaýymdastyq jáne qoǵamnyń pikirine qulaq túrip, álemdik tendensııalardy muqııat zerdelep, mass medıa týraly zańnama men onlaın platformalarǵa arnalǵan erejelerdi bólek qarastyrýdy jón sanadyq», dep jazdy mınıstr Facebook jelisinde.
Vedomstvo basshysynyń jazýynsha, bul zańnyń qabyldanýy Qazaqstan Respýblıkasyndaǵy onlaın-platformalardyń qyzmeti úshin quqyqtyq negizder qalyptastyrady, onlaın platformalar jáne onlaın jarnama salasyndaǵy retteýdiń normatıvtik negizin konseptýaldyq turǵydan ózektendirýge múmkindik beredi.
«Oǵan qosa, Eýropalyq odaq qabyldaǵan Digital Services Act nemese sıfrlyq qyzmetter týraly zańnyń balamasy ispetti bul zań álemdik áleýmettik jelilerdiń ınterfeısin qazaqshalaý, ınflıýenserlerdiń jarnamasyn tańbalaý, zańsyz kontentti neǵurlym tıimdi moderasııalaý máselelerin de retteıdi», delingen mınıstrdiń habarlamasynda.
Darhan Qydyráli atap ótkendeı, bul zań aıasynda kóleńkeli ekonomıka úrdisin azaıtý jáne onlaın alaıaqtyqpen kúresý boıynsha qajetti sharalar qabyldanady. Basqasha aıtqanda, oflaın ómirdegi jaýapkershilik onlaın álemde mindetteledi.
«Jalpy qabyldanǵan zań azamattardyń quqyqtary men bostandyqtaryn tolyqqandy iske asyrý úshin onlaın platformalarmen tıimdi yntymaqtastyq pen ózara is-qımyl ornatýǵa múmkindik beredi. Bul rette qazirdiń ózinde álemge áıgili áleýmettik jeliler men onlaın platformalar áriptestik ornatýǵa yqylasty ekendikterin tanytyp, keıbiri ókilderin taǵaıyndady.
Osy oraıda zańǵa bastamashy bolǵan depýtattarǵa, jalpy Májilis jáne Senat depýtattaryna, jumys tobynyń múshelerine, usynys aıtqan, qoldaý bildirgen barsha belsendi azamattarǵa alǵys aıtamyz.
Jańa zań el ıgiligine qyzmet etedi dep senemiz», dep túıindedi mınıstr.
