1999 jyly Aqtóbe qalalyq sút zaýyty negizinde qurylǵan «Aıs-plıýs» kompanııasy sút, ashytylǵan sút ónimderi men balmuzdaq shyǵarady. Kompanııa jyldan-jylǵa qýatyn arttyryp keldi. Máselen, 2018 jyly táýligine 20 tonnaǵa deıin balmuzdaq óndirýge múmkindik beretin ıtalıandyq óndiris jelisin iske qosty. 2020 jyly balmuzdaq sehy, 2021 jyly súzbe sehy jańǵyrtyldy.
Kezdesýde Májilis depýtattary ujym múshelerimen aldaǵy ýaqytta qaralatyn zańdar boıynsha pikir almasyp, jurtshylyqtyń oıyn bildi. Ujym músheleri aýyl sharýashylyǵy ónimderin ótkizý naryqtaryn keńeıtý máselesin sheshýdi jáne ishki naryqty qorǵaý jóninde sharalar qabyldaýdy surady.
– Biz zańdardy halyq úshin qabyldaımyz jáne halyqpen birge jazamyz. Basty ustanymymyz – osy. Máselen, halyqtyń qajetin qanaǵattandyrý maqsatynda Aýyl sharýashylyǵy mınıstrligine, jalpy Úkimetke kóptegen suraq qoıylyp, mal sharýashylyǵyn damytýǵa qatysty depýtattyq saýaldar joldandy. Qazir Agrarlyq máseler jónindegi komıtette «Organıkalyq ónim óndirý jáne onyń aınalymy týraly» jáne keıbir zańnamalyq aktilerge jaıylymdardy paıdalaný máseleleri boıynsha ózgerister men tolyqtyrýlar engizý týraly zań jobasy qaralyp jatyr. Azyq-túlik qaýipsizdigi máseleleri boıynsha elimizdegi jańa zań jobasyn ekinshi sessııada engizý josparlanyp otyr, – dedi Qazybek Álishev.
Ǵalymjan Eleýov turǵyndarmen kezdesýde kóterilgen máselelerge toqtaldy. Sonyń ishinde «Embi-Altyndy» tas jolynyń jaǵdaıy, Aqtóbedegi Shılisaı mektebi men Qandyaǵash, Embi qalasyndaǵy mektepterdiń qurylysy depýtattar baqylaýynda ekenin jetkizdi. Sondaı-aq Alǵa qalasy «Podhoz» eldi mekenindegi mektep máselesi de sheshilýge tıis.
Búginde «Aıs-plıýs» JShS «Amanat» partııasynyń jol kartasy sheńberinde jalpy quny 3 mlrd teńge bolatyn aýysymyna 50 tonna sút quıý sehyn ashý boıynsha ınvestısııalyq jobany júrgizip otyr. Qazirgi ýaqytta sehty qaıta qurý jáne qoımanyń qurylys-montaj jumystary aıaqtaldy.
Aqtóbe oblysy
