Depýtattar Aqsý qalasynyń aýyldyq aımaǵyna kiretin Pogranıchnık aýylyna sapary barysynda eki problemalyq nysandar - feldsherlik ambýlatorııa men dene shynyqtyrý-saýyqtyrý keshenin aralady. Qazirdiń ózinde olardyń qurylysy bekitilgen kesteden aqsap tur. Birinshi nysannyń merdigeri onyń merziminde iske qosylatynyna sendiredi. Degenmen, jumys kólemi artýy múmkin, óıtkeni, depýtattardyń aıtýynsha, jobany túzetý qajet.
«Feldsherlik ambýlatorııa aýmaǵyn abattandyrý tolyǵymen qamtylýy tıis. Jobany osy kezeńde qaıta qaraý kerek dep esepteımiz», dedi Amantaı Jarqynbek.
Nurjan Áshimbetov taǵy bir nysan – dene shynyqtyrý-saýyqtyrý kesheniniń merdigeri qurylys alańynda múlde joq ekenin atap ótti.
«Merdiger – «GradStroı» kompanııasy oblystaǵy áleýmettik nysandardy salý jáne jóndeý boıynsha kóptegen tenderlerdi utyp alyp, byltyrdan beri jergilikti memlekettik organdarmen sottasyp keledi. Bul rette merdiger uıymnyń ózi ornynda joq. Barlyq jumys qosalqy merdigerlerge berildi», dedi depýtat.
Sonymen qatar depýtattar Aqsý qalasyndaǵy magıstraldyq jáne taratýshy jylý jelilerin qaıta jańǵyrtý jumystarynyń barysymen tanysty. Mundaǵy jumystar kestege saı júrgizilip jatyr. Sonymen qatar №7 mektepte jylý, elektr jáne káriz júıelerine, qabyrǵalaryna, tóbelerine, edenderine kúrdeli jóndeý jumystary júrgizilip jatyr.
Májilismender «Jumyspen qamtýdyń jol kartasy» aıasynda qurylysy 2021 jyly bastalǵanymen, búginde irgetasy ǵana quıylǵan, qurylysy júrip jatqan Muz saraıynda da boldy.
«Aqsha bólindi, muz aıdynyn salýǵa merdiger kompanııa utys oıyny oınatyldy. Biraq jergilikti bılik nysandy asa qajet emes dep taýyp, qurylys toqtatyldy. Qazir bul nysandy jeke baqylaýyma aldym», deıdi Nurjan Áshimbetov.
Sapar sońynda depýtattar azamattardy qabyldady. Turǵyndar jaıylymdyq, shabyndyq jerlerge qatysty saýaldaryn qoıdy.
