Teatrdyń balet trýppasynyń kórkemdik jetekshisi, Qazaqstannyń halyq ártisi Gúljan Tútkibaeva Mılandaǵy «La Skala» teatrynyń jáne Úlken teatrdyń prıma balerınasy Svetlana Zaharovanyń shaqyrtýymen osy festıvaldyń qazylar alqasynyń múshesi retinde qatysty.
«Benois de la Danse» – 1991 jyly 29 sáýirde halyqaralyq horeograftar odaǵynyń uıytqy bolýymen bı kúnine oraı uıymdastyrylatyn dástúrli balet festıvali. Alǵashynda túrli balet mektepteri men zamanaýı baǵyttaǵy bıdiń úzdik ókilderiniń basyn qosatyn, álemdik qoıylymdar ótkizetin balet óneriniń gala-konserti retinde oılastyrylǵan edi. Bıylǵy nomınanttardyń qatarynda klassıkalyq baǵyttaǵy alty jetekshi ujym jáne ártúrli eldiń zamanaýı bı solısteri qatysty. Festıvalde Reseıdiń Úlken teatry, Sankt-Peterbýrgtegi Marııa teatry, Qytaı ulttyq balet teatry, Abaı atyndaǵy Qazaq ulttyq opera jáne balet teatry, Seýldegi Iýnıversal balet teatry, Novosibir opera jáne balet teatrynyń solısteri óner kórsetti. «Benois de la Danse juldyzdary» atty ár jyldardaǵy laýreattardyń gala-konserti ótip, kesh baǵdarlamasy bı ónerindegi túrli stıl men búgingi sahnanyń suranysyna saı eń erekshe bı týyndylaryn qamtydy. Bul keshte Malıka Elshibaeva men Azamat Asqarov Tımýr Myńbaevtyń «Freskalar» baletinen adajıo, al Bogdan Verbovoı men Janel Túkeeva Sergeı Prokofevtiń «Romeo men Djýletta» baletinen adajıo oryndady.
