«Astana» halyqaralyq qarjy ortalyǵynyń ákimshiligi» AQ atqarýshy dırektory Nurlan Toıymbek G4 City jobasy úshin qyzmettiń qajetti salalardaǵy qatynastardy retteıtin ózindik aktilerdiń belgili bir sanyn ázirleý qajet bolatynyn aıtty. Bul rette josparlaý satysynda G4 City aktilerimen retteletin salalardy aldyn ala anyqtaý mańyzdy. Qalǵandary Qazaqstan Respýblıkasynyń zańnamasymen retteledi.
Sondaı-aq N.Toıymbek Qazaqstanda sheteldik jumys kúshin halyqty jumyspen qamtý máselesi jónindegi ýákiletti organ belgilegen jáne bóletin kvota sheginde tıisti ákimshilik-aýmaqtyq birlikterdiń jergilikti atqarýshy organdary beretin ruqsattar negizinde jumys berýshiler tartatynyn atap ótti. ShJK-ny tartý máselelerin retteıtin negizgi normalar Qazaqstan Respýblıkasynyń «Halyqty jumyspen qamtý týraly» jáne «Halyqtyń kóshi-qony týraly» Zańdarynda qarastyrylǵan. Bul rette jekelegen rásimder zańǵa táýeldi birqatar aktimen retteledi.
G4 City jobasyn júzege asyrýdaǵy negizgi maqsat – qoǵamnyń áleýmettik qurylymyn sapaly ózgertý, deni saý, belsendi, bilimdi azamattardyń jańa býynyn qalyptastyrý. Bul, eń aldymen, halyqtyń ómir súrý sapasyn edáýir arttyrý, eldegi demografııalyq jaǵdaıdy jaqsartý, adam kapıtalynyń jáne elimizdiń serpindi damýyna jaǵdaı jasaý.
G4 City qalasy Jańa Jibek jolynyń boıynda ornalasqan jańa ekonomıkalyq jáne jahandyq týrıstik ortalyqqa aınalady dep kútiledi. Damýdyń aýqymdy perspektıvalaryn eskere otyryp, G4 City 2,2 mln-nan astam turǵyny bar ıntegrasııalanǵan qala retinde damyp, G4 City 2050 jylǵa qaraı 1,1 mln-nan astam jumys ornyn qamtamasyz etedi degen boljam bar.
Keńes qorytyndysy boıynsha Erulan Jamaýbaev memlekettik organdar men uıymdarǵa tıisti birqatar tapsyrma berdi.
