Menińshe, zań halyqtyń memleketke, bılikke senimin arttyrýǵa tıis. Sol sebepti shetelge zańsyz shyǵarylǵan aktıvterdi qaıtarý Ádiletti Qazaqstandy qurýdyń, ádilet ornatýdyń úlken quraly dep esepteımin. Depýtattardyń bastamasymen bes zań usynyldy. Kúni keshe Konstıtýsııalyq sot ony muqııat qarastyryp, Ata zańymyzǵa qaıshy kelmeıtinin, tolyqtaı saı ekenin habarlady.
Osylaısha, Memleket basshysy qol qoıǵan kúnnen bastap úlken jumys bastalady. Eń aldymen, uıymdastyrý sharalary qaralatyny sózsiz. Bas prokýratýra janynan arnaıy memlekettik organ qurylady, oǵan 125-ke jýyq túrli saladaǵy maman tartylady. Olar halyqaralyq zańnamany biletin, sheteldik zań salasynan habardar halyqaralyq mamandar, sarapshylar, zańgerler, ekonomısterden quralmaq. Budan bólek, Úkimettiń qaýlysymen qurylatyn memlekettik komıssııaǵa qoǵam qaıratkerleri, Parlament depýtattary, kúshtik qurylymdyq organdardyń basshylary enedi dep josparlanǵan.
Komıssııa turaqty túrde jumysyn atqaryp, memlekettik mekememen etene jumys istemek. Tapqan qujattaryn, derekterin, tizimin usynyp, zańsyz shyǵarylǵan aktıvterdi anyqtaýǵa belsendi túrde aralasady.
Qazirgi tańda elimiz kóptegen halyqaralyq mindettemeni oryndady. Qarjyny qaıtarý, jemqorlyqqa qarsy kúres jónindegi halyqaralyq qujattardyń múshesimiz. Osynyń barlyǵy bes zańdy qabyldaýda negizge alyndy. Endi zańdy júzege asyrý memlekettiń, kúshtik qurylymdardyń óz isine jaýapkershilikpen qaraý máselesine aınalady. Zań iske asyp, kezinde shetelge zańsyz shyǵarylǵan qarjylar men aktıvter qaıtsa, mol qarajat eldiń ıgiligine jumsalsa, Ádiletti Qazaqstannyń alǵysharttary jasalǵanyna halyqtyń kózi jetedi.
Aıdos SARYM,
Májilis depýtaty
