Sol jyldary qaqpashy Quralbek Ordabaev pen qorǵaýshy Seıilda Baıshaqov apta saıyn mıllıondaǵan kórermenniń kóz aldynda oıqastap júretin. Ol kezde Almatynyń ózinde qazaq balasy tym seldir. Aýyldan kelgen, ıaǵnı qanyna tartatyn baýyrlardyń kópshiligi KSRO joǵary tobyndaǵy «Qaırattyń» oıyndaryna Seıilda men Quralbek aǵalardy kórý úshin baratyn. Ortalyq stadıonnyń kúnbatys betindegi týnnelden Seıilda men Quralbek aǵalardyń tóbesi kóringennen myńdaǵan tileýlester moıyndaryn soza gýildesip, dýyldasa jóneletin. Al eki aǵamyz jaı basyp, joǵary órlegen kezde myń shaqyrym aýyldan artynyp-tartynyp ákemiz kelip jetkendeı máz-meıram bolýshy edik.
«Jan tartpaıdy, qan tartady» demekshi, Seıilda Baıshaqov alańǵa «Qaırattyń» kapıtandyq «povıazkasyn» taǵyp shyqqanda jalymyz kúdireıip, qanymyz ysyp shyǵa keletin. Seıildanyń qımyly óziniń minezi tárizdi ornyqty, tııanaqty. Keıbireýler tárizdi ushqalaqtanyp, sasqalaqtaǵanyn kórgen emespiz. Qashan kórseń aıaqty erkin tastap, qaraǵaıdaı boıymen anadaıdan kóz tartady. Qarsy jaqtyń oqtaı zýlaǵan, qyryq aılaly shabýylshylary úshin Baıshaqov naǵyz asý bermes, tasqamal qorǵanystyń ózi bolatyn. «Seıilda qarsylastyń kez kelgen shabýylshysyn tusaı biletin, – deıdi Quralbek aǵamyz. – Zerek, alǵyr sportshy. Eseppen, júıeli oınaǵandy unatady. Kóp sózge joq. Sabyrly. Komandadaǵy eń abyroıly, eń senimdi fýtbolshynyń biri retinde uzaq ýaqyt komandanyń kapıtany ári serkesi boldy».
Iá, qazaq fýtbolshylarynan eń alǵashqy bolyp KSRO quramasynda oınaǵan da osy Baıshaqov edi. Qyrsyqqanda, 1977 jyly KSRO quramasy Baıshaqov qatysqan eki básekede Majarstan men Grekııadan utylyp qalyp, ári qaraı aǵamyzdy ulttyq quramaǵa shaqyrmady. Ádilin aıtsaq, Seıilda Baıshaqov sol tusta keńes quramasyndaǵy qorǵaýshylardyń qaı-qaısysynan da kem soqqan joq. Biraq Máskeýdegi fýtbol qojaıyndarynyń syrt kózden tasa óz múddesi, óz saıasaty boldy.
Halqymyzdyń tuńǵysh kásibı fýtbolshysy Tımýr Segizbaevtan keıin «qazaq dop tebe almaıdy», degen tutas bir ultty qorlaýǵa baǵyttalǵan syńarjaq, taıaz, kertartpa pikirdi teriske shyǵarǵan aıboz uldyń biri ári biregeıi – osy Seıilda Ikramuly edi. Baıshaqov «Qaırattyń» sapynda 296 ret alańǵa shyǵyp, qarsy qaqpaǵa 11 dop engizdi.
Sonaý bodan zamanda, tar kezeńde qazaǵynyń ala doptaǵy namysyn áýelete kótergen Seıilda aǵa da máńgilik mekenine attandy. Kátepti qara kemedeı ornyqty azamattyń jany jánnatta bolýyna tilektespiz. Baıshaq áýletine Alla sabyr bersin!
Qazaq sporty áli talaı Seıilda izbasarlaryn alyp keletinine senemiz
Qydyrbek Rysbek,
sport jýrnalısi
