Sondaı-aq elimizdiń Ulttyq áskerı-patrıottyq ortalyǵynyń Ortalyq áskerı orkestri, Memlekettik kúzet qyzmetiniń prezıdenttik orkestri jáne Ulttyq ulannyń úlgili-kórsetilimdi orkestri qatysty. Jıyn barysynda Qorǵanys mınıstriniń orynbasary, general-leıtenant Sultan Kamaletdınov sóz sóıledi.
– Halyqaralyq áskerı orkestrler festıvali Astanamyzdyń beıbitshilik pen jasampazdyq qalasy, mádenıet pen halyqtardy bir ortaǵa tartyp, jaqyndastyratyn ortalyq ekeniniń jarqyn dáleli bolmaq. Mundaı erekshe is-shara yntymaqtastyqty damytýǵa, beıbitshilik pen tatý kórshilik ıdeıasyn ilgeriletýge yqpal eterine senimdimin, – dedi ol.
Band Marathon – qatysýshy orkestrlerdiń 20 mınýttyq qoıylymy. Bul kúni festıval qonaqtary elderdi ózara biriktiretin jáne nyǵaıtatyn sazdy áýen tilinde sóıledi. О́nerde shekara joq ekenin kórsetken álemniń biregeı áskerı orkestrleri ulttyq, shyǵarmashylyq jáne armııa dástúriniń alýan úlgisin kórermenderge usyndy.
Halyqaralyq áskerı orkestrlerdiń mýzykalyq festıvali aıasynda óner kórsetýshilerdiń qoıylymdary Ortalyq saıabaqta, «Báıterek» monýmentiniń janynda, «Han Shatyr» saýda oıyn-saýyq ortalyǵynda ótti. Ortalyq saıabaqta elorda turǵyndary men qala qonaqtary Úndistan, Japonııa áskerı orkestrleri men elimizdiń Memlekettik kúzet qyzmeti prezıdenttik orkestriniń ónerin tamashalady.
Úndistan Áskerı-áýe kúshteriniń birikken orkestri kórermenderdi marsh ánderimen, klassıkalyq áýenderdi ulttyq naqyshta oryndaýymen baýrap aldy. Orkestr óneriniń sheberligi ulttyq aspap – tabla barabanymen erekshe áser berdi.
Astanalyqtar Japonııanyń О́zin-ózi qorǵaý teńiz kúshteriniń orkestrin qushaq jaıa qarsy aldy. Kúnshyǵys eliniń ujymy ejelgi japon áskerı mýzykasy men zamanaýı marshtardy erekshe úlgide oryndady. Al О́zbekstan Qorǵanys mınıstrligi Ortalyq án-bı ansambli men Ortalyq áskerı orkestriniń ártisteri ózbek halqynyń ulttyq naqyshtaǵy ásem áýeniniń qýatymen ǵalamat áserge bólep, jurtshylyqty baýyrlas respýblıka ókilderin bımen de, qoshemetpen de qoldaýǵa shaqyrdy.
«Báıterek» monýmentinde Reseı Federasııasy Batys áskerı okrýginiń 23-áskerı orkestri, Túrkııa Ulttyq qorǵanys mınıstrliginiń áskerı orkestri jáne elimizdiń Qarýly kúshteri Ulttyq áskerı-patrıottyq ortalyǵynyń Ortalyq áskerı orkestri barabanshylardyń ónerlerin kórsetti.
Al «Han Shatyr» saýda oıyn-saýyq ortalyǵynda Qytaı Halyq Azat etý armııasynyń áskerı orkestri, Ázerbaıjannan kelgen Geıdar Álıev atyndaǵy áskerı ınstıtýttyń orkestri, elimizdiń atynan Ulttyq ulannyń úlgili-kórsetilimdi orkestri jurtshylyqty ásem áýenmen áldıledi. Osy kúnderi ótip jatqan áskerı orkestrler forýmy elimiz ben Astanamyzdyń mádenı ómirindegi eń jarqyn kúnder retinde halyqtardyń mádenıeti men shyǵarmashylyq ujymdar arasyndaǵy qarym-qatynasty nyǵaıtýǵa arnalǵan biregeı tuǵyrnamaǵa aınaldy.
«Barys Arena» muz aıdyny saraıynda ótken gala-konsertke jeti myńnan astam kórermen jınaldy. Qorytyndy konsertke Premer-mınıstr Álıhan Smaıylov, Qorǵanys mınıstri, general-polkovnık Rýslan Jaqsylyqov jáne basqa da memlekettik organdardyń basshylary qatysty.
Konsert qazaq handyǵy dáýiri qoıylymymen bastaldy. LED-ekranda ulttyq naqyshtaǵy oıý-órnek, qalqan, shańyraq jáne petroglıfter paıda boldy.
Elimizdiń Qarýly kúshteri Ulttyq áskerı-patrıottyq ortalyǵy Ortalyq áskerı orkestriniń, Memlekettik kúzet qyzmeti prezıdenttik orkestriniń, Ulttyq ulan úlgili-kórsetilim orkestriniń, Ázerbaıjan, Úndistan, Qytaı, Reseı, Túrkııa, О́zbekstan jáne Japonııa áskeriniń áskerı orkestrlerin kórermender aıryqsha qurmetpen qarsy aldy. Qazaqstan Qarýly kúshteriniń Bas áskerı dırıjeri, «Qurmet» ordeniniń ıegeri, maıor Almas Ibragımov bes júz mýzykantqa belgi berdi. Ulttyq áskerı-patrıottyq ortalyǵy Ortalyq ansambliniń ánshisi Dáýren Tóleýbaev, birikken hor jáne áskerı orkestr elimizdiń ánuranyn saltanatty túrde oryndap shyqty.
Memlekettik kúzet qyzmeti prezıdenttik orkestriniń qazaq halyq óneriniń injý-marjany sanalatyn «Iаpýraı» lırıkalyq ánin aıtýy erekshe áser qaldyrdy. Prologta Astanaǵa arnalǵan «Mereıtoılyq marsh» ótti. Jurtshylyq Memlekettik kúzet qyzmeti prezıdenttik orkestriniń álemge áıgili Maıkl Djekson men Lıonel Rıchıdiń tanymal áni We are the world-tyń oryndalýyn zor yqylaspen qabyldady.
Gala-konsert sońynda Qorǵanys mınıstri, general-polkovnık Rýslan Jaqsylyqov is-sharaǵa qatysýshylardy quttyqtap, sheteldik qonaqtarǵa marapat tabys etti.
– Qazaqstan – salt-dástúrge baı, beıbit el. Bul kúnderi elordamyz álem mádenıetin jınaı alatyn ásem ortalyqqa aınaldy. Bizge ár elden túrli ujymdar, talantty mýzykanttar men ánshiler keldi. Búgingi festıval dástúrge aınalyp, dostyq, yntymaqtastyq pen tatýlyq qarym-qatynastardy damytýǵa yqpal etedi dep oılaımyn, – dep atap ótti qorǵanys salasynyń basshysy.
Gala-konsert Ortalyq ansambl, birikken hor jáne orkestr solısteri Qaırat Baekenovtiń oryndaýyndaǵy «Astana» ánimen aıaqtaldy.
