Shildeniń 15-i kúni Abaı oblysynyń ákimi Nurlan Uranhaev Borodýlıha aýdanyna barǵan jumys saparynan oqıǵa ornyna jedel jetip, jaǵdaımen tanysty. Der kezinde qabyldanǵan sheshimniń arqasynda tilsiz jaý jaılaǵan aýmaq oqshaýlandy. Qazirgi ýaqytta onda saqtyq sharalary kúsheıtilgen.
«Shoshqaly» demalys aımaǵy tolyqtaı polısııa men tótenshe jaǵdaı qyzmetkerleriniń baqylaýynda. Besqaraǵaı aýdany ákiminiń orynbasary Nurjan Aǵybaevtyń aıtýynsha, turǵyndar úshin alańdaýǵa esh negiz joq.
– «Shoshqaly» demalys aımaǵynda oryn alǵan órt der kezinde sóndirildi. Aýdan ákimi Talǵat Muratov qazir sol jerde. Demalys aımaǵyna kelýshiler tolyqtaı kóshirildi. О́rt sharpyǵan aýmaqqa qatysty qosymsha jańa aqparat joq. Tilsiz jaýdy aýyzdyqtaýǵa jeke quram men bir tikushaq atsalysty. Aýdandaǵy tótenshe jaǵdaı ázirge kúshinde qalyp tur, – dedi N.Aǵybaev.
Atalǵan aımaqqa barǵan demalýshylardyń aıtýynsha, órt 14 shilde keshkisin naızaǵaı túskennen keıin tutanǵan. «Semeı ormany» mekemesi de, tıisti organdar da jaǵdaı baqylaýda ekenin málimdegenimen, qyzyl jalynnyń qaýipi áli de joǵary. Sondyqtan órt sóndirilgenimen, ol kez kelgen ýaqytta jeldiń kúshimen lap ete qalýy múmkin. Osy sebepten ormandy aımaq jiti baqylaýda bolǵany abzal desedi mamandar.
– Begen aýylynan kelip, demalýshylarǵa az-kem qyzmet kórsetip, kásip jasap júr edik. Myna jaǵdaıdan soń bárimizdi ol aýmaqtan tolyqtaı shyǵardy. Degenmen jaǵdaı durystalǵan soń isime qaıta kirisem degen úmitim bar, – deıdi Sárýar esimdi azamat.
Túıindeı aıtqanda, órt sóndirilip, jalynnyń joly kesilgenimen, onyń qaıta tutanýy múmkin degen kózderimen kúres áli de jalǵasyp jatyr. Ásirese qaraǵaılardyń ushar basyndaǵy butalardan bastalatyn jalyn jel ekpinimen kúsh alsa, óte qaýipti. Buǵan ótken aıda Borodýlıha aýmaǵyndaǵy 15 adamnyń ómiri men 60 myń gektar ormandy jalmaǵan alapat órtti aıtsaq ta jetkilikti.
Abaı oblysy
