Atap aıtqanda, Ishki ister mınıstrligi óz quzyreti sheginde ınternet jelisinde turaqty túrde zańsyz mazmundaǵy saıttarǵa monıtorıng júrgizedi. Zańsyz mazmun dep otyrǵanymyz – sýısıdke ıtermeleý, pornografııalyq materıaldardy taratý, qatygezdik pen zorlyq-zombylyq, ekstremızm men esirtki týraly aqparattar. «Zań talaptaryn buzǵan saıttarǵa jáne áleýmettik jeli qoldanýshylaryna qandaı sharalar qoldanylady?» degen saýalǵa kelsek, zańda onlaın-platformalar men blogerlerdiń quqyqtary men mindetteri belgilengen. Atap aıtqanda, qoldanystaǵy qylmystyq jaýapkershilikpen qatar jelide jalǵan aqparat taratqany úshin ákimshilik jaýapkershilik engizildi. Onlaın-platformalardyń qarapaıym paıdalanýshylary úshin aıyppul 20 AEK bolsa, kásipkerlik qyzmetpen aınalysatyn blogerler úshin – 40 AEK. Zań buzýshylyq oryn alǵan saıttar shetelde tirkelgen jaǵdaıda, olar týraly aqparat Aqparat jáne qoǵamdyq damý mınıstrliginiń ýákiletti organyna shara qabyldaý, ıaǵnı Qazaqstan azamattaryna qoljetimdilikti shekteý-buǵattaý úshin jiberiledi.
Jalpy, ınternettegi jalǵan habar taratý, ar-namysqa tııý, ekstremızm men terrorızmdi nasıhattaý sekildi quqyqqa qaıshy is-áreketter boıynsha shara qabyldaý – tek Ishki ister mınıstrliginiń mindetindegi jumys emes. Bul baǵyttaǵy jumystardy basqa da memlekettik organdar atqarady. Máselen, Ishki ister mınıstrligine AQDM men Bas prokýratýradan turaqty túrde hattar kelip turady. IIM Krımınaldyq polısııa departamenti Kıberqylmysqa qarsy kúres ortalyǵy óz baǵyty boıynsha jumys isteıdi. Biz kóbine ınternettegi alaıaqtyq qylmystaryna qatysty áreket etemiz. Al esirtki nemese ekstremıstik sıpattaǵy qylmystar boıynsha mınıstrlik quramynda jumys isteıtin arnaıy departamentter bar.
Jandos SÚIINBAI,
IIM Krımınaldyq polısııa departamenti,
Kıberqylmysqa qarsy kúres ortalyǵynyń basshysy
