Bul týraly olar Samruk-Kazyna Construction Basqarma Tóraǵasy Máýlen Aımanbetovtyń jumys sapary aıasynda ótken jeke kezdesýlerde aıtty. Eske sala ketsek, ótken aptada SK Construction basshysy Qaraǵandy, Pavlodar, Abaı jáne Shyǵys Qazaqstan oblystaryna at basyn burdy.
ShQO-ǵa jumys sapary kezinde Aımanbetov óńir basshysy Ermek Kósherbaevpen kezdesti. Oblys ákimi problemalyq máselelerdi sheshýde kómegin aıamaıtynyn aıtyp, sendirdi.
Ulttyq jobany iske asyrýǵa jetekshilik etetin oblys ákiminiń orynbasary apta saıyn SK Construction Shyǵys Qazaqstan óńirindegi ókili jáne merdigerlik uıymdardyń ókilderimen jınalys ótkizip otyrady. Bul jańa mektepterdi jobalaý jáne salý barysynda týyndaıtyn barlyq máselelerdi jedel jáne sapaly sheshýge múmkindik bermek.
Sondaı-aq Aımanbetov óńir basshysyna jaıly mektepterge jıhaz tańdaý boıynsha arnaıy komıssııa qurýdy usyndy. Komıssııa quramyna oblys ákiminiń jaýapty orynbasarynan bólek bilim basqarmasynyń qyzmetkerleri, mektep dırektorlary jáne olardyń ákimshilik-sharýashylyq jumys jónindegi orynbasarlary kirýi tıis. Komıssııa mektep jıhazynyń dızaınyn, túsin jáne basqa syrtqy parametrlerin anyqtaıdy. Ermek Kósherbaev kezdesý barysynda qaramaǵyndaǵylarǵa osyndaı komıssııa qurýdy tapsyrdy.
ShQO-ǵa jumys sapary barysynda Samruk-Kazyna Construction basshysy jaıly mektepter salynatyn birneshe jer ýchaskesin aralady. Birinshi kezekte ol Rıdder qalasyna bardy. Munda merdiger «AN Groups» JShS kelesi jyldyń kúzine deıin 600 oryndyq mektep turǵyzady.
Rıdder taýly jerde shamamen 700 metr bıiktikte ornalasqan, sondyqtan mektep salýǵa bólingen ýchaskeniń relefi óte kúrdeli. Sonymen qatar, jer telimi orman alqabynyń aýmaǵynda ornalasqan. Bul nysandy ornalastyrýda qosymsha qıyndyqtar týǵyzyp jatyr.
«Men aǵashtardyń eski ekenin kórip turmyn, sondyqtan sanıtarlyq kesý jumystaryn qolǵa alý qajet. Rıdder qalasynyń ákimi Darhan Qosantaevqa jáne basqa da jaýapty tulǵalarǵa jasyl jelekti otaý boıynsha qoǵamdyq tyńdalym ótkizýdi usynamyn. Tehnıkany jumyldyrý men qurylysqa daıyndyqty ýaqytyly bastaý úshin aýmaqty tez arada tazartý qajet», dep atap ótti Aımanbetov.
Samruk-Kazyna Construction basshysy Glýbokoe aýdanyndaǵy Beloýsovka aýylyna da bardy. Munda 300 oryndyq jaıly mektep salynady. Aýmaqta birneshe eski nysan tur, olardy buzý kerek. Sonymen qatar eski ınjenerlik jelilerdi shyǵaryp tastap, jańalan tartý qajet. Osy máselelerdiń barlyǵyn merdiger «Fırma Azııa» JShS jobalaýshy uıymmen birlesip tez ári uıymdasqan túrde sheship jatyr. Aımanbetov muny konsorsıýmnyń jaýapty jáne úılesimdi jumysynyń aıqyn mysaly dep atady.
Sondaı-aq Basqarma Tóraǵasy Opytnoe pole aýylyndaǵy 300 oryndyq mektep salynatyn jer ýchaskesi men О́skemendegi birneshe qurylys alańyn kórip, jaǵdaıdy baǵamdap qaıtty. Bir apta boıy óńirlerdi aralaǵan SK Construction basshysynyń jumys sapary osymen támamdaldy.
Ystyq aýa-raıyna qaramastan Aımanbetov jaıly mektepterdiń qurylysyna bólingen barlyq ýchaskelerde bolyp, daıyndyq barysymen tanysty. Bolashaqta Basqarma Tóraǵasy ulttyq jobanyń iske asyrylý barysyn baqylaý úshin óńirlerdi aralaýdy jalǵastyrmaq nıette.
Aıta keteıik, «Jaıly mektep» ulttyq jobasy aıasynda Shyǵys Qazaqstan oblysynda 10 mektep salý josparlanǵan. Olardyń jeteýi 2024 jyldyń sońyna deıin, al qalǵan úsheýi 2025 jyldyń aıaǵyna deıin tapsyrylady. Ulttyq jobanyń arqasynda óńir boıynsha 4,2 myń jańa oqýshy orny qurylady.
