Qazylar alqasy 12 jastaǵy Sherhanǵa konkýrstyń eki kúninde de joǵary baǵa (70 ball) bergen. Osylaısha, jas talant jalpy sany 140 ball jınap, eń joǵary nátıjege qol jetkizdi.
Al ekinshi oryndy jergilikti jas ónerpaz Sofııa Rýstamova (136 upaı) alsa, úshinshi oryndy armenııalyq Anaıt Galstıan (133 upaı) ıelendi. Konkýrsqa 8-14 jas aralyǵyndaǵy barlyǵy 18 eldiń jas oryndaýshylary qatysty.
Baıqaýdyń alǵashqy kúninde Sherhan Arystan Andrea Bochellı, Devıd Foster men Emı Fosterdiń Ama, Credi e vai («Súı, sen jáne qadam jasa») kompozısııasyn oryndady. Aıta keteıik, Almaty oblysynyń týmasy buǵan deıin de birneshe halyqaralyq baıqaýdyń laýreaty atanǵan.
Sondaı-aq halyqaralyq festıvaldiń estradalyq án oryndaýshylar baıqaýynda baq synaǵan Quralaı Meırambek te júldeli boldy. Eki kúndik baıqaý nátıjesinde armenııalyq ónerpaz Masha Mndjoıan bas júlde alsa, birinshi oryn belarýs Samır Elchıevke berildi. Ekinshi oryndy reseılik Elızaveta Slyshkına men ıtalııalyq Agape bólisti. Úshinshi oryndy Quralaı Meırambek pen ózbekstandyq Malıka Hakımova ıelengen.
О́ner dodasynda Quralaı belarýs halqynyń «Rechanka» ánin shyrqap, 70 upaıdyń 69-yn jınaǵan edi. Baıqaýdyń ekinshi kúni «Álemdik hıt» saıysynda «Frozen 2» anımasııalyq fılmindegi «Into the unknown» saýndtregin oryndap, 63 upaı aldy.
Aıta keteıik, eresekter baıqaýyna álemniń 30 elinen úmitker qatysady. Qazaq oryndaýshylar buǵan deıin atalǵan dodanyń birneshe márte jeńimpazy atanǵan edi. Dımash Qudaıbergen (2015 jyl) men Rýhııa Baıdúkenova (2021 jyl) Gran-prı jeńip alsa, ár jyldary Marjan Arapbaeva, Álisher Kárimov, Marhaba Sábı jáne basqa da ónerpazdar joǵary marapatqa qol jetkizdi.
