Osynaý irgeli oqý ordasyn bitirgen birshama úzdik túlekter óńir basshysy Nurjan Nurjigitovtiń qolynan dıplom aldy. Olardyń qatarynda óner men bilim salasynda, sportta aýyz toltyryp aıtarlyqtaı tabysqa qol jetkizgen myqtylar da bar.
Ýnıversıtetti úzdik aıaqtaǵandardy Ǵylym jáne joǵary bilim mınıstri Saıasat Nurbek onlaın rejimde quttyqtap, aq jol tiledi. Bul kúni oqý ordasyn úzdik bitirgen eki júzden astam túlek saltanatty jaǵdaıda dıplom aldy.
Is-shara barysynda sóz alǵan M. H. Dýlatı atyndaǵy Taraz óńirlik ýnıversıtetiniń rektory Muhtar Baıjumanov oqý ordasy san salany meńgergen tórt myńnan astam mamandy eńbek naryǵyna qosqaly otyrǵanyn jetkizdi.
Sondaı-aq ol óz sózinde oqý orny kadr daıarlaýda halyqaralyq baılanystardy nyǵaıtyp otyrǵanyn, «qos dıplomdy» bilim berý baǵdarlamasynyń sheńberinde D.Mendeleev atyndaǵy Reseı hımııa-tehnologııalyq ýnıversıteti jáne «Qazfosfat» JShS-men birlesken TMD elderi boıynsha alǵashqy jelilik kampýs jaqyn kúnderi iske qosylatynyn atap ótti.
