Senat depýtaty Aınur Arǵynbekova Semeı qalasyndaǵy «Jylýkomýnenergo» MKK-de boldy jáne 2023-2024 jyldarǵa arnalǵan jylytý maýsymyna daıyndyq josparymen tanysty. Ol qaladaǵy qazirgi kezdegi jylý kózderi týraly jan-jaqty habardar boldy. Oǵan sonymen qatar №1 jylý energetıka ortalyǵy kórsetildi jáne jergilikti 92 qazandyqtyń keıbiri kúrdeli jóndeýdi qajet etetini týraly aıtyldy.
«О́tken qysta Ekibastuz ben Rıdder qalalarynda jylý kózderi men jylý jelisiniń qanshalyqty tozǵanyna kýá boldyq. Abaı oblysynda osyndaı jaǵdaıdy boldyrmaý úshin qysqy maýsymǵa daıyndyq máselesine erekshe nazar aýdarýymyz kerek», – dep atap ótti Aınur Arǵynbekova.
Depýtatqa sondaı-aq jylý berý maýsymyna daıyndyq jumystary aıasynda aýqymdy jumys atqarylǵany, atap aıtqanda, «Ǵabbasov» qazandyǵy qaıta jańartylǵany jáne jalpy aǵymdaǵy jóndeý jumystary jalǵasyp jatqany týraly habarlandy. Depýtat Arǵynbekova óz kezeginde jergilikti bılik bul máseleni baqylaýda ustaýy tıis ekendigi jáne jylý kózderi men jylý jelisiniń jaı-kúıine turaqty tekserý júrgizý qajettigin atap ótti.
«Qalanyń barlyq jylý jelisin normatıvtik kúıge keltirý oblysymyzdyń basym mindetteriniń biri jáne ol birneshe jylǵa eseptelgen aýqymdy jumys. Biz óńirden saılanǵan depýtattar retinde bul máseleni de baqylaýda ustaıtyn bolamyz», – dedi senator.
***
Májilis depýtaty, JSDP fraksııasynyń múshesi Ajar Saǵandyqova Pavlodar oblysyna jumys sapary barysynda Qanysh Sátbaev atyndaǵy kanaldyń №4 sý elektr kesheniniń №87 bógetine bardy. Strategııalyq nysan apatty jaǵdaıda tur, biraq josyqsyz merdigermen sottasyp jatqandyqtan servıstik kompanııa tender ótkize almaı otyr. Kanaldyń Pavlodardaǵy basqarma basshysy Vladımır Egerdiń aıtýynsha, kanaldyń naqty paıdalaný merzimi 60 jyl bolsa, standartty merzimi 25 jyl. Tehnıkalyq qoldaý kórsetilse de arnanyń sýmen qamtamasyz etý deńgeıi tómen. Bul qysqy maýsymda apatqa ushyraý qaýpin týdyrady.
«Qazir kanal jumys isteýi kerek qalypty ustap turý gorızonty deńgeıine jetý úshin shamamen bes mln tekshe metr sý jetispeıdi. Al búkil kanal boıynsha 70 mln tekshe metrden astam sý tapshylyǵy baıqalady. Qys mezgiline mundaı tómen sý deńgeıimen kirý qaýipti, óıtkeni mundaı kórsetkishpen biz sorǵy stansalary men basseınderin qamtamasyz ete almaımyz. Jańa tenderlerdi de jarııalaı almaımyz, óıtkeni sot úderisi júrip jatyr», – dedi Vladımır Eger.
Depýtat Ajar Saǵandyqovanyń aıtýynsha, másele arnanyń buryn derbes zańdy tulǵa bolǵanynda eken. Odan keıin «Kazvodhozǵa» aýystyrylǵan.
«Ońtústiktegi ırrıgasııalyq júıelerdi jóndeý kerek boldy, al kanal, bir ǵajaby, halyqaralyq bankterden nesıe alýǵa kepildik boldy. Buryn ózin tolyq aqtap kelgenimen, kezekti jáne kúrdeli jóndeý jumystaryn júrgizýge olardyń jeke kadrlary, óz qarajattary boldy. Biz, depýtattar, bul arna ózin-ózi qamtamasyz etetindikten ári el úshin strategııalyq mańyzy zor bolǵandyqtan, ony kepilden alyp, jeke-dara derbes zańdy tulǵa etý kerek degen máseleni kóterdik. Munda qarjy salý kerek, óıtkeni 22 sorǵy stansasy jumys isteıdi, olardyń árqaısysy qaıta qaraýdy jáne kúndelikti jóndeýdi qajet etedi», – dedi Ajar Saǵandyqova.
2018 jyly «Qazvodhoz» RMK jarǵylyq kapıtalyn ulǵaıtý» baǵdarlamasy aıasynda 241 apatty sý qoımasy men gıdrotehnıkalyq qurylystardy qalpyna keltirýge, onyń ishinde osy bógetti jóndeýge respýblıkalyq bıýdjetten qarajat bólindi. Shartty oryndaý barysynda onyń merzimi birneshe ret uzartyldy. «Qazvodhoz» RMK Pavlodar oblysynyń mamandandyrylǵan aýdanaralyq ekonomıkalyq sotyna merdigerdi memlekettik satyp alýdyń josyqsyz qatysýshysy ekendigi týraly talap-aryzben júgindi. Merdiger qarsy talap qoıyp, úderis uzaqqa sozylyp ketti. Qazirgi ýaqytta azamattyq is qaralýda, is boıynsha qurylys-ekonomıkalyq qaıtalama sot saraptamasy taǵaıyndaldy. Azamattyq is boıynsha túpkilikti sheshim qabyldanǵan joq.
***
Májilis depýtaty, «Aýyl» partııasy fraksııasynyń múshesi, Agrarlyq máseleler komıtetiniń tóraǵasy Serik Egizbaev Aqmola oblysyna jumys saparmen baryp, Egindikól aýdanyndaǵy Nura toptyq sý qubyrynyń qaıta jóndeý jumystarymen tanysty.
Kórsetilgen sý qubyry oblystyń birqatar aýdanyn, sonyń ishinde Egindikóldi qamtıdy. Sapar barysynda Serik Egizbaev Ekologııa mınıstrligi, «Kazvodhoz» mekemesi men oblys ákimdiginiń ókilderimen birge jergilikti halyqpen jáne merdiger ujymmen kezdesti. Talqylaýda qurylystyń bastalýy men aıaqtalý merzimi talqylandy. Májilismen bul másele depýtattardyń turaqty baqylaýynda bolatynyn atap ótti.
Sondaı-aq Serik Egizbaev «Jer Ana» JShS, dándi daqyldardy óndirý jáne satýmen aınalysatyn «Sharafýtdınov ı K» JShS jáne Egindikól aýylynyń abattandyrý jumystarymen tanysty. Sonymen qatar depýtat Astrahanka kentiniń ortalyq qazandyǵynda bolyp, Jaltyr kentindegi «Mıll ı promyshlennaıa kompanııa» JShS jáne «AZAM-KS» kásiporyndarynyń, Astrahan aýdany «Novyı Kolotýn» aýylyndaǵy «Ostrogorskıı» JShS qyzmetimen tanysty. «Makınsk» qus fabrıkasynyń jumysshylarymen de kezdesti.
